Les lletres asturianes llamenten la perda de la escritora y activista Helena Trexu Fombella

La escritora Helena Trexu Fombella finó'l pasáu vienres a los 84 años dexando una vida entera de compromisu cola cultura y la llingua asturianes. Entidaes como Iniciativa pol Asturianu, el PEN Asturianu o l’Academia de la Llingua Asturiana amosaron el so pesar pola perda de l’autora. La ceremonia de despidida y homenaxe tuvo llugar el domingu 30 nel Tanatoriu Noega de Xixón a les 18 hores con presencia abondosa de personalidaes de la cultura asturiana faciendo compañía a la familia.

Nacida en Sama (Llangréu) en 1944, Helena Trexu desarrolló una importantísima trayectoria lliteraria venceyada a la creación n’asturianu. Volvió a Asturies nos años ochenta tres d'una estancia en Cataluña y dende la so torna a Asturies implicósese dafechu nel movimientu asturianista dende l’ámbitu políticu y cultural, centrando'l so llabor na defensa del asturianu y na creación lliteraria nesta llingua. En 1999 fundó l’Asociación Cultural Grupu Epona, entidá dedicada a la realización de cuentacuentos y talleres infantiles impartíos n’asturianu, amás de la edición de llibros.

La so obra yá ye parte de la hestoria recién de la lliteratura n'asturianu y destácase pola so amplitú y variedá, siempres con un claru envís social y respaldada por dellos premios. L'autora, parte del movimientu lliterariu del surdimientu, destaca non sólo pola so poesía y narrativa p'adultos. La so producción tuvo tamién dafechamente empobinada a les xeneraciones más moces, con títulos como Olaya n’África (ALLA,2010), Dos histories d’animales (Madú, 2006), A la gueta setes na seronda (Asturtoons, 2006) o Mitoloxía asturiana pa rapacinos y rapacines (Grupu Epona, 2007), ente otros. La so calidá lliteraria vien respaldada por dellos gallardones, como'l Premiu de Poesía de L'Entregu, el Premiu de Traducción de L'ALLA por El caminante y la muria (orixinal de Salvador Espriu), el Premiu de Poesía Vital Aza por Abril (Grupu Epona, 2001), el Premiu de Poesía Elvira Castañón por Ringleres de carbón y salitre (VTP, 2003), el II Concursu de Rellatos de Muyeres del Conceyu Llaviana por Onde'l ríu besa la mar (Grupu Epona, 2001), el Premiu Asturnet por Llara quier ser astrónoma (Grupu Epona, 2011) o el Premiu del Certame Llectures pa rapazos de l'ALLA por Olaya n'África.

Dende Iniciativa pol Asturianu quixeron destacar «el valor de la so contribución a la normalización social y lliteraria del asturianu, entendiendo la creación lliteraria como una ferramienta fundamental pa garantizar que la llingua tea presente en tolos ámbitos de la vida y que les nueves xeneraciones puedan lleer, deprender y esfrurar de la lliteratura nel so propiu idioma y siempres con valores como’l feminismu y l’ecoloxismu presentes».

L’Academia de la Llingua Asturiana tien a Trexu como «una persona que llevaba la dignificación y la recuperación de la llingua asturiana por bandera y que siempres tuvo claro’l papel de les muyeres y la lliteratura nesa xera».

Pela so parte, el PEN Asturianu, del que participaba como escritora asociada, unvió un comunicáu describiéndola como «una de les voces que más trabayaron nes últimes décades pa la dignificación de la lliteratura asturiana, con una obra considerable, sobre manera en poesía, la traducción y la lliteratura infantil y xuvenil».

El mundu lliterariu asturianu ta de llutu pola perda d'una muyer que foi incansable na defensa de los derechos llingüísticos y la dignificación lliteraria y social del asturianu. Pa enanchar les nueses lletres queden la so vida y obra, que tovía va siguir sumando al corpus lliterariu asturianu, yá qu'hai a lo menos una obra nueva a poques d'espublizase cola editorial La Semeya. Ente muyeres, la so novela yá póstuma, ye un bálsamu que nun algama pero sí ayuda a llevar la perda d'Helena Trexu, que nunca nun dexó d'escribir poemes, cuentos y noveles. Nun llegó a ver la oficialidá del asturianu, pero la so memoria va siguir emburriando la llucha pola que trabayó tola vida.

---

---