Comerciu d'Uviéu va sortear 20 entraes dobles pa la Ópera ente los sos veceros hasta'l 19 de setiembre
AGORA
El presidente de Comerciu d'Uviéu, Nacho del Río, señaló que la iniciativa pretende ufrir «cada vez más razones pa escoyer el comerciu d'Uviéu»
04 sep 2026 . Actualizado a las 05:00 h.Comerciu d'Uviéu y la Unión de Comerciantes del Principáu d'Asturies punxeron en marcha una promoción que va permitir sortear 20 entraes dobles pa esfrutar de la Ópera d'Uviéu ente los veceros que faigan les sos compres nos establecimientos participantes hasta'l próximu 19 de setiembre.
La campaña, activa dende esti llunes, busca fomentar les compres nel comerciu llocal y reforciar la conexón ente l'actividá comercial y la vida cultural de la ciudá. Pa participar, los consumidores van tener qu'aportar a la promoción al traviés del códigu QR incluyíu nos materiales de la campaña, siguir les indicaciones y rexistrar los sos datos.
El presidente de Comerciu d'Uviéu, Nacho del Río, señaló que la iniciativa pretende ufrir «cada vez más razones pa escoyer el comerciu d'Uviéu» y destacó la oportunidá de xunir les compres con «ún de los grandes referentes culturales de la nuesa ciudá». «Queremos que'l veceru atope cada vez más razones pa escoyer el comerciu d'Uviéu. Nesta ocasión xunimos les compres con ún de los grandes referentes culturales de la nuesa ciudá, como ye la Ópera, y ufrimos la posibilidá de convertir una compra cotidiana nuna esperiencia especial», afirmó.
Del Río insistió amás na importancia de desendolcar acciones que conecten el comerciu con otres actividaes de la ciudá. «El comerciu forma parte de la vida d'Uviéu. Cuando llogramos vinculalo cola cultura, colos eventos o con otres actividaes que xeneren movimientu, tamos faciendo una ciudá más dinámica y, al mesmu tiempu, sofitando a los nuesos establecimientos», indicó. La promoción coincide col regresu a l'actividá habitual tres el branu y l'entamu de setiembre, periodu nel que'l sector busca recuperar la intensidá comercial.
Con esta campaña, Comerciu d'Uviéu sigue cola so estratexa de promover acciones destinaes a premiar la fidelidá de los consumidores, aumentar la visibilidá de los establecimientos y asociar la compra llocal con esperiencies vinculaes a l'actividá cultural de la ciudá. La campaña va permanecer abierta hasta'l 19 de setiembre y inclúi'l sortéu d'un total de 20 entraes dobles pa la Ópera d'Uviéu.