El Festival de Gaites de Villaviciosa vuelve a enllenar la villa de música tradicional esta fin de selmana
AGORA
La Banda Gaites Villaviciosa-El Gaiteru celebra'l so 40ª aniversariu con una programación musical de cuatro díes, de xueves a domingu, que promete poner a la villa a danzar al son de les gaites
03 sep 2026 . Actualizado a las 17:48 h.Villaviciosa acueye dende esti xueves 3 y hasta'l domingu 6 la nueva edición del Festival Internacional de Gaites (FIG). El festival qu'entama la Banda Gaites Villaviciosa-El Gaiteru va cuntar esti añu con más de trescientos músicos y una programación centrada na música tradicional qu'esparde les actividaes per dellos puntos de la villa, incluyendo esposiciones, charres, talleres, alcuentros profesionales, pasucáis, concursos, presentaciones y, por supuestu, conciertos.
L'actuación de Bagad Kemper, una de les formaciones de referencia de la música bretona, ye ún de los reclamos de mayor sonadía pa esta cita. El conciertu va tener llugar el sábadu ye la so primer actuación n'Asturies dientro de la Nueche Folk del FIG. El cartelu d'esa nueche va completase col asturianu José Manuel Tejedor y Dixebra.
La gaita va caltener el so protagonismu y les persones visitanttes van poder esfrutar de la esposición «Canteros del Soníu-La Gaita de La Oliva», allugada na Casa de los Hevia y que s'inaugura'l mesmu xueves a les 18:00 hores. La colección presenta una reproducción del capitel de la ilesia de La Oliva cola gaita por motivu y que se considera una de les primeres representaciones del instrumentu en tola xeografía ibérica. L'amuesa va acompañada d'una charra temática a les 19.30 hores, que va completase con una ruta didáctica hasta la propia ilesia. Darréu, a les 20:00 hores, la celebración continúa col pasucáis inaugural de la Banda Gaites Villaviciosa-El Gaiteru y va siguir col conciertu inaugural, protagonizáu por Beo. La xornada del xueves va rematar con una sesión folk nel chigre La Caleyina Les Indies.
El vienres va poder esfrutase d'un día de pasucáis, mercáu tradicional y conciertos de les bandes participantes, amás de la proyección del documental «Y agora que lo baillen los rapacinos. Lo llixero n’asturies» de L'Andecha Folclor d'Uviéu en collaboración con Cuatro Gotes Producciones. Pa poner el ramu a la xornada, a partir de les 21.30 hores va poder esfrutase de la X Nueche en Danza coles actuaciones de Rellume, Orquestina La Xarangana y Ambás y Ramsés.
La programación del sábadu entama a les 12.00 hores cola apertura al públicu del mercáu tradicional y pela mañana tamién va tener llugar el IX Alcuentru d'Artesanos d'Instrumentos Musicales Tradicionales. Pela tarde, l'alcuentru de bandes de gaites va axuntar agrupaciones de Baleares, Galicia y Asturies. La Banda Gaites Villaviciosa-El Gaiteru va ufrir un conciertu especial pa celebrar el so 40.º aniversariu. La xornada va incluyir tamién un taller pa neños, actuaciones de baille y un pasucáis de les bandes que va percorrer la villa pa dir empobinando la Nueche Folk qu'entama a les 22:00 hores y que van protagonizar una de les formaciones de referencia de la música bretona, Bagad Kemper, completando'l cartelu dos grupos asturianos de referencia como son José Manuel Tejedor y Dixebra.
El domingu 6 va abrir cola misa asturiana de gaita a les 10.30 hores, siguida del XVI Concursu de Gaiteros y Gaiteres «Memorial José Huerta». Pela tarde va presentase'l trabayu del artesanu Iván González: la gaita asturiana de cámara. Arriendes d'esto y pa poner el ramu a la xornada y al festival, va disputase'l VII Certame de Cantar Asturianu «Xavi Solares», con categoríes infantil y adulta.