L'Asociación de Profesionales de la Ilustración d'Asturies organiza La Folixa, un alcuentru abiertu al públicu
AGORA
La Folixa va tener llugar esti sábadu 5 de setiembre en Santolaya de Morcín nel marcu de la FLIPA 2026 qu'organiza APIAST y va cuntar con una programación abierta al públicu xeneral qu'inclúi música, charres, talleres y más sorpreses
03 sep 2026 . Actualizado a las 13:04 h.L'Asociación de Profesionales de la Ilustración d'Asturies (APIAST) desendolca esti añu una programación bien bayurosa cola que busca dar a conocer l'oficiu al públicu xeneral. FLIPA ye la Folixa de la Ilustración Profesional Asturiana, una estensa programación cultural organizada por APIAST col sofitu del Gobiernu d'Asturies, con actividaes espardíes a lo llargo de tol añu 2026 y La Folixa sedría a la FLIPA lo que'l Día Grande a unes fiestes populares. La cita va tener llugar esti sábadu 5 de setiembre nel área recreativa de Santolaya de Morcín. Un alcuentru abiertu al públicu y de carácter festivu nel que les persones asistentes van poder esfrutar d'una xornada enllena de música, talleres, alcuentros y otres actividaes venceyaes a la ilustración.
La organización insiste nel mesmu programa en que les persones participantes «pueden dibuxar», convidando asina a los y les asistentes a dexase llevar pola creatividá y esfrutar non sólo como espectadores, sinón tamién como axentes productores d'arte, buscando asina averar la pasión pola ilustración al públicu xeneral.
El programa de La Folixa del sábadu 5 inclúi:
- CHIGRE con refrescos, agua, xugos, cerveza FLIPA2026 de Caleya y otres marques.
- PUNTU D'INFORMACIÓN con venta de chapes, camisetes, material de dibuxu, númberos de rifa y solicitúes p'asociase.
- DIBUMATÓN d'APIAST
- DIBUXA UNA POSTAL Y LLEVA OTRA ILUSTRADA
Horarios:
12:00 a 12:15h Entrada de Gaites y tambor. (Puede dibuxase)
12:15 a 12:30h Discursu d'inauguración con autoridaes.
13:00 a 14:00h Dinamización: panderetes con Pau Santirso. (Puede dibuxase)
14:00h a 16:00h Xinta con música ambiente. Va haber daqué espicha pero encamiéntase llevar bocáu de casa. Nel pueblu tamién hai chigre.
16:00h a 17:00h Llegada de les Aniciadores (pasucáis, llectura del manifiestu y posáu). (Puede dibuxase)
17:00 a 18:00h Música ambiente
18:00 a 19:30h Conciertu ilustráu con Ítaca Music y APIAST.
19:30 a 20:00h Rifa d'obres ya intercambiu de postales ilustraes. Despidida y pieslle de la xornada.
APIAST, la entidá que preside Eva Rami, entamó la so actividá en 2024 pa dar rempuesta a les necesidaes d'un sector con gran puxu nel territoriu. Trátase d'una entidá ensin ánimu d'arriquecimientu destinada a defender los intereses del gremiu y que funciona col trabayu voluntariu de les persones asociaes. Profesionales que, repartíos por tola xeografía asturiana, mesmo urbana que rural, dedíquense a esta disciplina artística en tola so amplitú estilística, formal, técnica y material, abarcando toles estayes del oficiu: dende'l trabayu editorial o el cómic al tatuaxe o la pintura mural, pasando pol merchandising, videoxuegos, animación, publicidá o testil, ente otres disciplines. La ilustración como carrera profesional, que yá se vía complicada por cuestiones d'autoría y de vulneración de los derechos llaborales básicos, tien agora otra dificultá añadida por causa del usu de la Intelixencia Artificial Xenerativa, lo que fai qu'APIAST seya anguaño más necesaria que nunca pa sofitar a los y les profesionales del sector.