La banda xixoniega ye la encargada d'abrir los Directos Vibra Mahou d'Asturies nesti añu 2026
09 sep 2026 . Actualizado a las 17:21 h.La música vuelve tener una cita coles sales asturianes de la mano de Vibra Mahou, la plataforma de música de Mahou Cinco Estrelles qu'impulsa esperiencies cinco estrelles alredor del directu. Y ye qu'esti 12 de setiembre, Drugos va inaugurar na Sala Estilo d'Uviéu'l ciclu Directos Vibra Mahou n'Asturies, dando empiezu a una programación que va incluyir tamién a Shego y a Chiquita Movida.
La banda asturiana, qu'atesora trés discos d'estudiu y años de rodaxe per sales, llega a esti primer conciertu del ciclu dempués de ganar la XI edición del concursu Talento Ribera 2026 y de presentar esti mesmu añu'l so tercer álbum, ‘Haz ruido mientras puedas’. Con ellos falamos díes enantes d'esti conciertu.
-Vais ser los encargaos d'abrir el ciclu Vibra Mahou el 12 de setiembre. ¿Cómo encaráis esti conciertu en casa?
-Con ilusión y munches ganes, la verdá. ¡Cualquier escusa ye bona pa venir cerquina de la nuestra ciudá natal!
-En xineru salió a la lluz el vuestru últimu discu, «Haz ruido mientras puedas». ¿Cómo ta siendo l'acoyida?
-Increíble. Sales atarraquitaes mientres la primer metá d'añu, festivales nos últimos meses, tou esto con xente coriando los nuestros cantares a sacu… Tamos contentísimos.
-Una xira na que sumáis yá más de 30 conciertos. ¿Qué balance facéis?
-Que les coses tán diendo perbién, que somos mui afortunaos y qu'acaldía nos gusta más tocar los nuestros cantares delantre de peña. Per otru llau, pa qué mentir, ye una matada tremenda, pero paga la pena.
-¿Cómo se vive dende dientro formar parte d'una banda asturiana agora mesmu?
-Asturies ye mui roquera y mui fan de los cantares dende siempre, y nós llevamos Xixón por bandera allá onde vamos. Equí siempre hubo munchos artistes xóvenes con coses que cuntar y, mientres un tiempu, daba la sensación de qu'eso taba de capa cayida, pero paez qu'agora volvemos ser unos cuantos los que tamos faciendo música. Que la xente nos pueda tar asociando a dalgún movimientu cultural asturianu o daqué pol estilu ta guapísimo.
-¿Sentís que ta pasando daqué interesante alredor de la música que se fai equí?
-Veníamos d'unos años nos que yéremos pocos proyectos asturianos independientes faciendo coses por tol país, paez qu'agora somos más y eso mola. Los años van dicir hasta qué puntu foi más o menos interesante lo que pasó nesta década colos artistes asturianos.
-¿Qué-y fai falta a la música fecha n'Asturies pa que tenga más repercusión?
-Ún nunca sabe'l porqué de la repercusión que pueda tener un cantar. Fíxate na inmensa cantidá de cantares que fueron esitazos y que, oxetivamente, nun son nada del otru mundu, al marxe de que seyan pegadices o non. Esto ye, agora sería'l típicu momentu nel que te dicimos que “oxalá les discográfiques apostaren polos proyectos nuevos”, y por supuestu que molaría un montón, pero les coses nun son blanques nin negres y nunca esiste una única fórmula pa llegar a más xente, porque la suerte xuega un factor considerable nesta partida. Munchos artistes de sellu discográficu tienen miles d'oyentes mensuales pero nun vienden tantes entraes, y dellos artistes independientes nun tienen munchos oyentes pero enllenen sales. En resume: nun tenemos nin idea. Nós somos músicos, non empresarios.
-¿Recordáis dalgún conciertu especialmente malu o especialmente surrealista qu'agora vos faiga gracia cuntar?
-Siempre hai díes que toques meyor qu'otros, pero nun recordamos nengún conciertu catastróficu no musical. Sí qu'hubo ún que foi lloquísimu nel nuestru primer añu como banda, allá per 2019, que diba ser un acústicu que nos entamó un chaval de Madrid y depués resultó nun tener nin micrófonos, polo que tocamos como si tuviéramos nel salón de casa delantre de cuatro gatos. Surrealista, pero fiximos una versión guapísima de “Insurrección” ¿Por qué non?
-Y al contrario: ¿hai dalgún conciertu que recordéis y penséis «esti día entendimos por qué facemos esto»?
-Bien d'ellos, gracies a Dios. El más llocu probablemente fuera'l de la Sala But, en Madrid, en xineru. Más de mil persones a tope dende'l primer cantar hasta'l postreru. Hubo otru na Acapulco (Xixón), delantre de 500 persones, nel que Jano, que venía acatarradísimu, quedó ensin voz nel antepenúltimu cantar. El públicu púnxose a cantar los bises como si ellos fueren el vocalista principal de la banda. Foi bastante épico.
-Si pudierais volver al primer ensayu de Drugos y falar mientres cinco minutos con aquellos qu'empezaben, ¿qué-yos diríais?
-Nun camudaríemos nada, tamos mui contentos con cómo tán les coses y, modestia aparte, pensamos que fiximos tolo meyor que pudimos. Somos conscientes, entá asina, de que si-yos cuntáramos lo que llevamos vivío, fliparíen en colores, claro.