Los Acebos: «Facer cantares dábame esa esperanza de que cada día cuntaba y nun taba perdiendo'l tiempu»

Los Acebos ye'l proyectu personal d'Alberto Rodríguez, una iniciativa que cristalizó nel 2023 como una urxencia creativa nun momentu decisivu de la so vida. La banda asturiana atopó la so seña d'identidá nel equilibriu, combinando la pegada de riffs potentes cola sensibilidá de pasaxes acústicos delicaos. El resultáu ye un soníu indie rock cargáu de matices, onde la llírica enceta la necesidá d'escorrer suaños y dexar fluyir les emociones, tresmitendo una sensación de vértigu y intimidá. Agora, cuando ta a poques d'entrar la seronda, la banda asturiana espubliza «23», un discu que fala sobre dexase llevar y salir de la zona de confort. Falamos con Alberto Rodríguez y conocemos de manera más fonda esti proyectu.

—«23» naz, según cuentes, d'un momentu críticu de la to vida y, en principiu, nin siquier taba pensao pa convertise nun proyectu musical. ¿Qué tuvo que pasar pa qu'aquel desfogue personal acabara convirtiéndose nun discu y, dempués, nuna banda?

—Si soi sinceru, nun tengo nin la mas remota idea. Dacuando la vida son intuiciones, faes llocures y estes llocures llévente a sitios…

—Hai dalgo mui humano na idea de facer cantares porque precises facelos. ¿En qué momentu te decatasti de que Los Acebos dexara de ser a cencielles una vía d'escape pa convertise en daqué que queríes llevar muncho más lloñe?

—Cuando grabé los primeros cantares nel local d'ensayu, namás por divertime, nun había nengún tipu de pretensión. Soi bastante curiosu y empecé a mandar el discu a medios de comunicación, a intentar refinar el pitch, a buscar los mios conciertos… Empecé a ver que dalguna vegada poníen un cantar na radio, incluyíase en llistes editoriales, o tocábamos en dellos sitios pa poder presentar el proyectu a la xente. Ehí empecé a interesame un poco más y diose la casualidá de qu'entré en Paideia, con una formación d'industria musical. Pasaron munches coses pel mediu, pero'l resume ye que pudi conocer a Juande. Con él fiximos el LP d'Esclavos de la Intensidá, y al tiempu entré n'Esmerarte. Pasó too casi ensin dame cuenta en realidá, siempre con bien de trabayu y dalgún qu'otru golpe de suerte. 

—El discu percuerre un camín que va dende cantares nacíos nun momentu complicáu hasta otros nos qu'apaez más claramente la esperanza. ¿Escuches agora «23» como una semeya d'una etapa de la to vida?

—Ensin dulda. Foi un percorríu que realmente camudó l'aldu de la mio vida en 180 graos. Sigo trabayando na oficina, sicasí'l fechu d'intentar too esto diome una esperiencia increíble que voi recordar siempre. Esti procesu ayudóme a entender que la vida ye mui curtia pa conformase coles coses que nun t'enllenen, o pa nun intentar facer les coses que realmente t'enllenen.

—El títulu «23» fala d'esa mocedá na que paez que tolos suaños siguen siendo posibles. ¿Por qué precisabes recuperar precisamente esa idea?

—Dacuando la vida llévate por sitios que nunca planiasti, y eso pue nun facete del too feliz. Creo que na mio vida los 23 fueron un puntu críticu que me marcaron por munches razones. Quiciabes tea intentando volver a esi puntu pa tomar les decisiones que realmente quería tomar. ¿Quién sabe?

—Nel discu apaez con fuerza la idea de romper cola rutina, con trabayos que nun enllenen o inclusive con relaciones que caltenemos a cencielles porque formen parte de la nuestra zona de confort. ¿Hai daqué de «23» que precisares aplicate a ti mesmu? 

—¡Too! Realmente tolos cantares son reflexones personales sobre momentos críticos que me fueron pasando. Puen tener distintes notes emocionales, pero tolos cantares falen sobre cómo viví toes eses situaciones.

—«Esclavos de la intensidá» y «A flor de piel» representen, según espliques, esi cambéu hacia cantares menos dramáticos y más esperanzadores. ¿Qué pasó ente aquellos primeros cantares y estos pa que camudara la to manera d'escribir?

—Que too empezó a tener xacíu pa mi. Empecé a facer cantares, y a intentar que la xente les escuchara. El mio tiempu llibre empecélu a emplegar en too eso. Facer cantares dábame esa esperanza de que cada día cuntaba y nun taba perdiendo'l tiempu. Supongo que foi eso lo que realmente me fixo escribir cantares.

—Musicalmente, Los Acebos muévese dientro del indie rock, con unes guitarres que tienen bastante protagonismu. ¿Qué busques cuando una guitarra entra nun cantar? ¿Pue cuntar daqué que nun seya a esplicase con pallabres?

—Nun me gusten muncho les etiquetes, anque entiendo que son necesaries. Dende'l mio puntu de vista, catalogaría la música que facemos como pop o pop/rock. Realmente cuando me pongo a componer tengo de tener daqué que cuntar. Gústame muncho componer un tema solu o directamente componelo con Juande, y dempués trabayalo xuntos. Apriendo un montón acaldía con él no que cinca a la manera d'entender la música, tengo muncha suerte. Pero realmente veo cualquier instrumentu como una ferramienta pa cuntar una historia, y nun-y doi tantu pesu a la melodía nun principiu.

—Hai una frase que resume perbién l'espíritu del proyectu: «espertate simplemente pensando en facer cantares». ¿Esi ye agora mesmu'l to oxetivu vital: consiguir que facer música dexe de ser daqué que faes y se convierta na to manera de vivir?

—Sí, en verdá sí. Quiciabes dalgún día camude esi pensamientu. Pero realmente fáime feliz componer o presentar los temes en directo, ver la reacción de la xente, que la mayoría de les vegaes ye la primer vegada que nos escucha. Esti en Madrid, empezamos a tocar Esclavos y la xente qu'había na sala cantábala a plenu pulmón. Nun dábemos creitu. Supongo qu'esos momentos dan sentíu a tolos que plantegues si merez la pena dedicar tanta enerxía a too esto.

—Cuando daquién escuche «23» de principiu a fin, ¿qué te gustaría que-y quedara: una historia sobre ti, un impulsu pa camudar daqué de la so propia vida o simplemente ganes de volver escuchar el discu?

—Realmente gustaríame que la xente sacara'l so propiu significáu col so propiu contestu. Quiciabes pa delles persones nun tenga un gran significáu, y pa otres persones seyan cantares qu'encaxen nel so momentu vital d'esi momentu… Creo que los cantares tienen esa maxa. Con que xeneren dalgún tipu de reacción o emoción na persona qu'escucha,  yá toi contentu.

—L'álbum sal esti 11 de setiembre y supón un pasu importante pa Los Acebos. ¿Qué te da más vértigu d'esti momentu: publicar los cantares, tocales en directo o descubrir qué faen con elles les persones que les escuchen? 

—Nunca pensé neso ?a?a?a. Ye como que fago cantares y depués cántolos. Esfruto muncho faciendo eso. Espero qu'a la xente-y guste , por supuestu, pero nun pienso muncho más allá.

—Si pudieres sentate güei delantre d'aquel Alberto qu'empezó a escribir estos cantares nún de los sos momentos más complicaos, ¿qué-y diríes?

—Que confíe y que sobre manera esfrute del procesu. ¡Que los meyores cantares tán por venir!

—Y mirando palantre: si «23» representa esi momentu nel que decidisti escorrer un suañu, ¿qué suañu te gustaría que cuntara'l próximu discu de Los Acebos?

—Siguir participando. Si nun te toca'l cupón, a lo menos que te toque lo puesto pa mercar otru hahahaha.

---

---

---