Pablo X. Suárez, Lourdes Álvarez, Erika Martínez y Ben Clark son los autores escoyíos pa participar nesti eventu
10 sep 2026 . Actualizado a las 10:46 h.El V Ciclu de poesía QED vuelve los díes 1, 2 y 3 d’ochobre con una nueva edición dedicada a la poesía y la escena contemporánees. La propuesta, que tresllada la palabra poética más allá de los espacios habituales, va llevar recitals, llectures, actividaes nes aules y espectáculos de poesía escénica a Mieres, Lieres y Uviéu.
El programa va arrancar el xueves 1 d’ochobre, a les 19.00 hores, na Llibrería La Llocura de Mieres, con un recital poéticu nel que van participar Pablo X. Suárez, Lourdes Álvarez, Erika Martínez y Ben Clark. Los cuatro autores van compartir versos, voces y miraes al traviés de propuestes poétiques distintes.
La programación va siguir el vienres 2 d’ochobre pela mañana, a les 12.00 hores, nel CP Xentiquina de Lieres (Siero), col programa ‘Poetes nes aules’. La iniciativa busca acercar la poesía al alumnáu y xenerar un diálogu ente los autores y les nueves xeneraciones. Esa mesma xornada, a les 19.00 hores, la Biblioteca d’El Fontán d’Uviéu va acoyer una llectura de poemes protagonizada polos cuatro autores participantes nel ciclu.
La última xornada, el sábadu 3 d’ochobre, va coincidir cola Nueche Blanca d’Uviéu y va tar dedicada a la poesía escénica. A les 22.00 hores, la Plaza del Paragües va acoyer dos espectáculos: ‘Nun fala en singular’, de Patricia Suárez y Lucía Arnaldo, y ‘Cortar pescado en Manila’, de Miguel Rodríguez Monteavaro y Andrés Rodrigues.
Con esta quinta edición, el Ciclu de poesía QED vuelve apostar pola convivencia de voces, xeneraciones y formes distintes d’entender y facer poesía, xenerando espacios d’alcuentru y intercambiu cultural. La propuesta combina la llectura y el recital cola educación y la escena, llevando la poesía a llibreríes, biblioteques, centros educativos y espacios públicos.
El V Ciclu de poesía QED ta dirixíu por Miguel Rodríguez Monteavaro, con imaxe y gráfica de Laura Bitxo. El ciclu cuenta col sofitu de la Conseyería de Cultura, Política Llingüística y Turismu del Principáu d’Asturies, la Fundación Municipal de Cultura del Aytu. d’Uviéu, Uviéu Ciudá candidata Capital de la Cultura 2031, Asturies Cultura en Rede y ATEM.