Artes escéniques, música, lliteratura, cultura tradicional, cine y ciencia formen parte d'un catálogu empobináu a escollinos dende Infantil hasta Bachilleratu
11 sep 2026 . Actualizado a las 17:33 h.El gobiernu asturianu presentó en La Llaboral la nueva edición de la Xira Didáctica, una iniciativa que xune educación y cultura y avera al alumnáu les llingües propies d'Asturies, l'asturianu y l'eonaviegu, al traviés de propuestes diseñaes específicamente pa les distintes etapes educatives.
La edición d'esti cursu inclúi 92 funciones y actividaes gratuites en 36 conceyos y amplía'l so alcance respectu al cursu anterior, tanto pola variedá de la programación como pola so estensión nel territoriu: la Xira pasa de 30 a 46 proyectos, de 26 a 37 compañíes, profesionales y entidaes y de 30 a 36 conceyos.
Artes escéniques, música, lliteratura, cultura tradicional, cine y ciencia formen parte d'un catálogu empobináu a escollinos dende Infantil hasta Bachilleratu. L'alumnáu va poder disfrutar de propuestes creaes pola industria cultural asturiana y diseñaes pa que'l deprendimientu de les llingües propies rellaciónese tamién cola esperiencia cultural, combinando conteníos adaptaos a cada edá cola calidá artística de los espectáculos y actividaes.
La Xira Didáctica va empezar el 19 d'ochobre en Quirós con El trasgu y el molineru, de La Compañía de l'Alba, y va rematar el 18 de xunu con dos propuestes: Al rodiu l’horru, de É Vero Teatro, en Cabranes, y Verdín. El día qu’una faba cósmica aterrizó n’Asturies, de El Arca de Mozart, en Les Regueres.
La participación en toles actividaes ye gratuita, lo que dexa averar una programación cultural estable n'asturianu y eonaviegu a escolinos y convertir teatros, cases de cultura y otros espacios en llugares d'alcuentru ente l'idioma, la creación y el deprendimientu.