Beatriz Quintana Coro convierte'l duelu en lliteratura: «Pa mí, falar de la muerte de mio padre siempre fue un tema tabú»

Beatriz Quintana Coro (Llangréu, 1995) torna a les llibreríes de la mano d’Ediciones Trabe con La fía'l mineru, una obra fonda y personal na que esplora les raíces de la so propia identidá al traviés del impactu imborrable de la muerte del so padre na mina. Partiendo d’esti fechu determinante, la moza escritora asturiana reflexona sobre’l duelu, la memoria y la manera na que los acontecimientos más drásticos molden la nuesa forma d'entender el mundu.

—¿En qué momentu decides escribir un llibru sobre una perda tan importante como la d’un padre?

—En 2022, Chechu García convidóme a participar nel recital de Compañeru dame tira, nes xornaes de Castilletes y Carbón, en Ciañu. Escribí dos testos espresamente pa esi recital, y a raíz d’ellos surdió esti llibru.

—Yeres una neña cuando tuvo llugar aquel tráxicu accidente. ¿Cómo recuerdes esi momentu y qué buelga dexó en ti?

—Tengo poques alcordances de mio padre, pero sí m’alcuerdo del momentu en que mio madre me dixo que morriera. Anque l’accidente fue cuando yo tenía 5 años, hasta l’adolescencia nun fui consciente de tolo qu’implicó, y gracies a escribir esta obra entendí qu’estes coses van dexando buelga tolos díes, poco a poco.

—¿Cuánto hai d’autobiográficu y cuánto de ficción en «La fía del mineru»? ¿Qué parte de los tos propios recuerdos echasti na historia y qué parte pertenez a la ficción?

—El llibru ye autoficción, polo que ye completamente autobiográficu y la única ficción qu’esiste nél ye lo que’l llector tien qu’inventar pa rellenar los silencios que dexo.

—¿Cómo foi’l procesu d’escritura? ¿Hebo dalgún momentu especialmente complicáu, sobre too pola carga emocional de la historia?

—Esta obra escribíla «en secretu», ensin falar con naide d’ello hasta que nun tuvo terminao, y nes hores llibres que tenía nel trabayu. Fue difícil, porque pa mí siempre fue un tema tabú, asina que tuvi que desfaceme de munchos prexuicios p’algamar un testu con sentíu, y además tuvi que manexar con munchu procuru la llinia ente lo íntimo y lo artístico.

—Imaxino que detrás de la novela hubo tamién un importante procesu de documentación. ¿Cómo foi esi trabayu y qué descubriste durante esi procesu?

—La documentación básase más que nada nos informes del accidente y na prensa, que nun fue difícil de consiguir gracies a que mio madre nunca tira nada.

—Más allá de la perda y del duelu, ¿qué otros temes t’interesaba abordar con esta historia?

—En ciertu mou, quería escribir sobre un garrapiellu de coses que son importantes pa mí, y una d’elles ye cómo vemos el mundu de maneres distintes según el nuestru contestu. Asina, el llibru tamién fala sobre les ausencies, facese mayor, la supuesta transición industrial…

—¿Crees que escribir sobre una esperiencia tan dolorosa ayudóte d’alguna manera a entendela o a cerrar feríes?

—Sí.

—¿Qué sentisti cuando’l llibru vio finalmente la lluz?

—¿La verdá? Pánicu.

—¿Cómo ta siendo la reacción de los llectores y de les persones del to entornu que conocíen la historia?

—D’esti llibru tán surdiendo conversaciones increíbles, como xente que m’escribe nes redes sociales pa dicime que vivieron perdes asemeyaes a les míes y que, gracies a lleeme a mí, agora quieren deprender sobre lo que pasó nes sos families. Anque al escribir siempre busco’l valor lliterariu, esti valor humanu que nun esperaba ta siendo perimportante pa mí.

—¿Trabayes yá n’otra obra? ¿Qué nos pues adelantar?

—Tengo terminao trés noveles curties terminaes, un poemariu y una antoloxía de rellatos. Nun sé qué va pasar con ello, porque la mio parte ye escribir y dempués namás queda esperar a que dalguién te dea la oportunidá de sacalo. Agora mesmo toi trabayando en dalgo asemeyao a La fía’l mineru, y demientres intento sacar alantre un proyectu musical nuevu que me tien mui ilusionada.

---

---

---