El Muséu del Pueblu d'Asturies acueye esti sábadu les IV Xornaes d'Estudiu del Traxe Asturianu «Luis Argüelles», dedicaes al calzón, y presenta'l llibru «La montera n'Asturies»
AGORA
Les xornaes van axuntar a dellos investigadores especializaos n'indumentaria tradicional asturiana
30 sep 2026 . Actualizado a las 12:53 h.El Muséu del Pueblu d'Asturies acueye'l próximu sábadu, 3 d'ochobre, a partir de les 11.00 hores, la IV edición de les Xornaes d'Estudiu del Traxe Asturianu «Luis Argüelles». D'esta vuelta, l'alcuentru ta dedicáu al calzón, la prenda masculina que, dende finales del sieglu XVI, cubrió los muslos de campesinos y artesanos y que caltuvo la so vixencia mientres más de trés sieglos, hasta los sos postreros y aisllaos portadores a mediaos del sieglu XX.
Les xornaes van axuntar a dellos investigadores especializaos n'indumentaria tradicional asturiana, que van ufiertar una visión actualizada y documentada d'una prenda que, hasta'l momentu, fuera oxetu d'escasu estudiu. La cita enmárcase nun proyectu qu'arrincó nel 2023, dedicáu entós al dengue, y que siguió nel 2024 cola montera y nel 2025 col xustillu, ediciones que se completaron con dos esposiciones de pieces orixinales calteníes gracies al curiáu de los sos propietarios y al llabor del propiu Muséu del Pueblu d'Asturies.
La xornada va entamar a les 11.00 hores cola conferencia inaugural, «Cíngulos, bragues y faldellines», a cargu de Fe Santoveña Zapatero. A les 12.30 hores, María Teresa Reigada García y Rubén Fernández Martínez van falar sobre «Calzones y pantalones na documentación asturiana: característiques y evolución (1750-1900)». A les 13.15 hores va presentase'l llibru «La montera n'Asturies», antes del zarru de la sesión de mañana, previstu pa les 14.15 hores. Frutu del trabayu d'un equipu interdisciplinar d'investigación etnográfica qu'estudia ocho exemplares orixinales con más d'un sieglu d'antigüedá, la publicación percuerre la trayectoria d'esta prenda, símbolu de l'asturianía que llegó hasta los nuestros díes de la mano de los grupos de baille y les bandes de gaita, y recueye tanto les monteres d'usu cotidianu como les sos socesives reinterpretaciones nel ámbitu del folclor
Les actividaes van retomase a les 16.15 hores cola conferencia «El calzón n'Asturies», impartida por Lilián Suárez Casielles. A les 17.15 hores, Marcos Llen Fernández va ufiertar la ponencia «Curtiu, hasta la rodía. Trés sieglos de calzones nes modes populares». Les xornaes van zarrase a les 18.30 hores cola so clausura.