Más de mediu millar de proyectos axúntense nesti directoriu entamáu por Musicasturiana.com
09 oct 2026 . Actualizado a las 13:41 h.Musicasturiana.com ta acabante d’estrenar la web de SIENTI, la guía de la escena musical n’asturianu. Nesta primer versión de la web yá puede consultase la información de más de mediu millar de fiches d’Artistes, DJs, espectáculos, agrupaciones de música tradicional, eventos, espacios escénicos, empreses de la industria musical, formación, tiendes, talleres y otros proyectos d’apoyu a la música. Esti directoriu fízose gracies a la collaboración de persones y entidaes que s’apuntaron a la iniciativa nos trés procesos d’inscripción que s’abrieron ente 2024 y 2026.
La guía entra agora en procesu de maquetación pa sacar la so versión física, de la que van editase un mínimu de 2.500 exemplares pa distribuyir per cases de cultura, programadores públicos y privaos, oficines de turismu, stands en feries y congresos culturales, bares, sales, tiendes, públicu y ente tola xente que faiga una aportación económica al proyectu. La fecha de llanzamientu d’esta guía impresa va ser el próximu mes de payares, coincidiendo col novenu aniversariu de musicasturiana.com.
El proyectu de SIE
NTI nació a finales de 2024 col oxetivu de facer más fácil el trabayu de les distintes persones vinculaes a la industria cultural y tener una utilidá evidente que pue vese con exemplos como estos: «Si soi un programador públicu o priváu: ¿a qué artistes puedo llamar? ¿con quién contrato l’equipu de soníu?… Si soi públicu: ¿qué grupos hai? ¿a qué festivales puedo dir?. Si soi artista: ¿en qué sales puedo tocar? ¿quién pue grabame un videoclip?. Si quiero ser parte d’esta escena: ¿en qué escuela deprendo a tocar un instrumentu?. D’esta manera, empreses, profesionales, artistes, asociaciones, instituciones… van poder apaecer y consultar estes «páxines marielles» de la música asturiana pa desendolcar meyor el so llabor.
Otru de los puntos fuertes de SIENTI ye que sirve p’amosar nun únicu catálogu tola vitalidá de la escena musical asturiana y p’ayudar a esportar la música d’equí, amás de crear públicu. Ye asina un recursu afayadizu pa poder representar a Asturies n’eventos internacionales como’l Womex, Fitur, BIME, Lorient… D’esta miente da soluciones a dalgunes carencies que tien la industria musical asturiana como la falta de visibilidá y el desconocimientu; la poca información y la interrellación ente axentes; les dificultaes de representación; y la desigualdá respecto a otros territorios y sectores.