Patricia Martínez Cueto gana la cuarta edición del «Premiu Pachín de Melás» de testos teatrales n'asturianu
AGORA
El xuráu destaca la naturalidá del asturianu y una propuesta que combina tradición y modernidá con un «dominiu plenu de la espresión corporal y de la musicalidá»
20 oct 2026 . Actualizado a las 12:16 h.Patricia Martínez Cueto la cuarta edición del Premiu Pachín de Melás de testos teatrales n'asturianu por Llugares comunes. Drama rural femenín en trés actos. El xuráu, presidíu pol director xeneral d'Acción Cultural y Normalización Llingüística, Antón García, destacó la so capacidá pa combinar tradición y modernidá a partir de «un ritmu bien fluyíu» y de «un usu del asturianu mui natural, mui tradicional».
El galardón forma parte de les iniciatives del Gobiernu d'Asturies pa sofitar la creación lliteraria n'asturianu y favorecer que les obres escrites nesta llingua atopen tamién el so espaciu sobre los escenarios. Con esti premiu, la conseyería reconoz el talentu de los que escriben teatru n'asturianu y facilita que los sos testos puedan llegar al públicu al traviés de la so publicación y representación.
La obra ganadora esplora, amás, les posibilidaes escéniques del testu más allá de la palabra. El fallu sorraya «el dominiu plenu de la espresión corporal y de la musicalidá» y valora'l xuegu colos elementos audiovisuales pa marcar el pasu ente actos y escenes, xuntu cola elección de los axetivos que los introducen.
El xuráu tuvo integráu por Begoña Martínez Cezón, Eloy Antuña Zamarro, José Antonio García Fernández y Tamara Collar Rodríguez, con M.ª Dolores Rodríguez Vázquez, responsable de promoción del asturianu de la Dirección Xeneral d'Acción Cultural y Normalización Llingüística, como secretaria. El Premiu Pachín de Melás ta dotáu con 6.000 euros y busca que les obres reconocíes lleguen tamién a los escenarios. Por eso, amás de la coedición del testu ganador, contempla la so coproducción con una compañía profesional y la so incorporación a les actividaes culturales promovíes pol gobiernu.
Con esti galardón, el Gobiernu d'Asturies favorez la creación teatral n'asturianu y la so puesta n'escena, dando percorríu a los testos más allá del propiu premiu. El certame recuerda col so nome al dramaturgu Emilio Robles Muñiz (Xixón/Xixón, 1877-1937), conocíu como Pachín de Melás y fundador de la corriente costumbrista.
Patricia Martínez Cueto ye llicenciada en Periodismu y desenvolvió parte de la so trayectoria profesional en distintos medios de comunicación. Dende 2018 exerz como profesora de Llingua Castellana y Lliteratura nel Institutu de L'Infiestu, onde caltién tamién una estrecha rellación col teatru al traviés de los grupos y representaciones que coordina nel centru.