Bruseles va ayudar a modernizar la flota pesquera y va buscar alternatives al desembarque de captures
AGORA
La XE reconoz que la pesca y l'acuicultura, qu'empleguen directamente a más de 200.000 persones y desempeñen un «papel clave» na transición hacia un sistema alimentariu sostenible y competitivu
21 oct 2026 . Actualizado a las 12:04 h.La Comisión Europea (CE) decidió esti martes sofitar la modernización y descarbonización de la flota comunitaria y buscar alternatives al desembarque de les captures pesqueres dempués de constatar qu'esa obligación «nun dio los resultaos esperaos». Son dos de les prioridaes de trabayu que s'afitó Bruseles nel marcu de la «Visión 2040 pa la Pesca y Acuicultura», presentada esti martes.
El documentu reconoz que la pesca y l'acuicultura, qu'empleguen direutamente a más de 200.000 persones na XE, desempeñen un «papel clave» na transición escontra un sistema alimentariu sostenible y competitivu. P'avanzar nesi oxetivu, apunta a una «estratexa integral» con midíes a curtiu, mediu y llargu plazu. D'esi plan falaron en rueda de prensa'l vicepresidente executivu de la CE Raffaele Fitto y el comisariu de Pesca, Costas Kadis.
P'avanzar nos retos pendientes, la «visión» establez cinco prioridaes, entamando pol amenorgamientu de les captures non deseyaes. La normativa europea prohibe puramente los descartes (refugos) nel mar, lo que significa que los barcos tán obligaos a llevar a puertu toles captures d'especies comerciales regulaes por cuotes o talles mínimes, independientemente del so tamañu, valor o de si se pescaron por accidente.
Bruseles almite qu'esa obligación «nun dio los resultaos esperaos, especialmente no que cinca a la so aplicación práutica» y avanza que, tres un diálogu col sector que va tener llugar más p'alantre anguaño, «la Comisión va esplorar soluciones concretes, como l'usu de nueves tecnoloxíes y una documentación de les captures más refecha».
De segundes, la CE quier trabayar na modernización y descarbonización de la flota p'ayudar a los buques a amenorgar les sos emisiones y a ameyorar les condiciones de trabayu a bordu. Pa ello propónse anovar unes directrices de 2014 sobre l'equilibriu ente la capacidá pesquera y les posibilidaes de pesca, afrontando ente otros aspectos la capacidá d'estracción y la meyora de les condiciones sociales.
De terceres, plantega reforzar el sofitu a la pesca a pequeña escala y, de cuartes, garantizar una competencia lleal, a partir de condiciones de competencia equitatives. De quintes, Bruseles propón dar mayor seguridá a los inversores y a los operadores d'acuicultura, ayudando al mesmu tiempu a los Estaos miembros a aprovechar tol potencial de l'acuicultura.
El comisariu européu de Pesca, Costas Kadis, dixo en rueda de prensa qu'anque la «visión 2040» nun apunta a la revisión de la Política Pesquera Común, tampoco nun la esclúi. Trátase d'afrontar les debilidaes con unes midíes que Bruseles va aldericar colos interesaos pa ver si «son abondes» y llueu «van decidise los próximos pasos». Pa la transición enerxética del sector, el documentu apunta a dos fases: la primera d'elles hasta 2030, p'ameyorar la eficiencia enerxética y de recursos, desenvolver nueves tecnoloxíes y capacidaes, y utilizar los combustibles llimpios disponibles. A partir de 2030, los esfuercios van centrase n'escalar tecnoloxíes de baxes y cero emisiones, col sofitu de financiamientu, infraestructures y la modernización de la flota.
Per otra parte, la visión inclúi midíes pa sofitar la viabilidá económica y la resiliencia de la pesca y l'acuicultura de la XE. Nel casu de la última, Bruseles prepara una llei pa dotase d'un marcu qu'ofreza mayor seguridá a les empreses y fomente la inversión. Tamién se busca impulsar la demanda d'esos alimentos producíos na XE per aciu del sofitu a la diversificación y ayudando a los consumidores a tomar decisiones informaes. Como parte d'esti esfuerciu, la Comisión va promover la trazabilidá dixital pa tolos productos en tola cadena de suministru pa 2029. La «visión» inclúi una estratexa esterior, pa promover nuevos alcuerdos marítimos sostenibles. Amás, Bruseles comprométese a asegurar la igualdá de condiciones nel mercáu y protexer la cadena de valor pesquera europea de práctiques comerciales abusives de flotes de terceros países.