Samartín del Rei Aurelio celebra un Samaín de mieu con una programación del 29 d'ochobre al 4 de payares
AGORA
La Casa del Terror, campamentos urbanos, talleres infantiles y cine protagonicen una selmana d'actividaes gratuites pa tolos públicos
22 oct 2026 . Actualizado a las 13:24 h.El Samaín más terroríficu va celebrase en Samartín del Rei Aurelio con una programación de mieu, del 29 d’ochobre al 4 de payares, que tien como platu fuerte l’apertura de la Casa del Terror, en Sotrondio, amás de la celebración de campamentos urbanos, talleres de manualidaes y cine pal públicu infantil y xuvenil. La organización cuerre al cargu de la Conceyalía de Cultura y Mocedá.
La Casa del Terror, que va instalase nes dependencies de la Casa de la Mocedá, va abrir les sos puertes al públicu los díes 29 y 30 d’ochobre, de cuatro a ocho de la tarde. La actividá va tar al cargu del módulu de dinamización del tiempu llibre del actual Taller d’Empléu Municipal. D’esta manera, Samartín recupera una propuesta d’ociu que tuvo una gran acoyida nes ediciones anteriores.
Pa facilitar la conciliación de la vida familiar y llaboral mientres el periodu non llectivu escolar, coincidiendo cola ponte de Tolos Santos, la Conceyalía va entamar tres campamentos urbanos en Blimea, Sotrondio y L’Entregu. El Samaín va ser la temática central d’estes actividaes, que se van celebrar el vienres 30 d’ochobre, el martes 3 de payares y el miércoles 4 de payares, de 9.00 a 14.00 hores. Pa participar, ye necesario inscribise presencialmente na Casa de la Mocedá.
El programa inclúi tamién un taller de pantasmes pa neños y neñes a partir de seis años, el xueves 29 d’ochobre, a les 18.30 hores, na Casa de la Cultura Gaspar García Laviana, en L’Entregu. Amás, va proyectase’l llargumetraxe Weapons el sábadu 31 d’ochobre, a les 19.00 hores, nel Teatru Municipal Nuberu, nuna sesión incluyida tamién na programación del festival de curtios CINESAN.