Shego: «Munchos cantares que pensamos que falen d'una ruptura amorosa falen d'una ruptura d'amistá»

Les madrilanes Shego van llegar el próximu 24 d’ochobre a la sala Tribeca Live d’Uviéu de la mano de Directos Vibra Mahou, el ciclu musical de Vibra Mahou que reivindica les sales como’l verdaderu corazón de la música en directo y como motor fundamental pal desenvolvimientu del talentu musical nel estáu.

El propiu nome de la banda yá da una pista de lo que va atopar el públicu. Shego garra’l so nome de la villana de la serie d’animación Kim Possible, una escoyeta qu'engancha col calter irreverente qu'acompañó al grupu dende los sos entamos. A partir de les sos primeres demos, la formación madrilana foi construyendo una identidá propia alredor d’una combinación de punk, pop y lo-fi, con riffs directos, melodíes fresques y lletres que tomen lo cotidiano como puntu de partida pa falar d’emociones, rellaciones y contradicciones. Con elles falamos enantes de qu'aporten a Uviéu y ufiertar el so conciertu.

— No lo volveré a hacer salió en 2025 y supunxo un pasu importante respecto a SUERTE, CHICA. ¿Qué descubristis de vosotres mesmes como banda mientres el procesu de facer esti segundu discu?

— Descubrimos que tocar en directo enseñáranos más de lo que pensábemos. Foi lo que nos permitió grabar el discu en directo.

— En 2025 falasteis muncho del amor, el desamor y les contradicciones personales; con MIAU ponéis el focu nes ruptures d'amistá. ¿Qué tien perder una amiga que dacuando resulta más difícil d'esplicar que una ruptura sentimental?

— Nun ye tanto que seya más difícil d'esplicar, pero, si hai una dificultá, quiciabes seya una cuestión de falta de referentes sobre cómo falar d'eso. En realidá, seguro que munchos cantares que pensamos que falen d'una ruptura amorosa falen d'una ruptura d'amistá. Los códigos y los dolores son asemeyaos, pero como tamos siempre un poco obsesionaes cola centralidá de la pareya…

— Munches veces damos por fecho que les amistades de verdá son pa tola vida. ¿Creéis que cuesta más aceptar el final d'una amistá porque socialmente tenemos menos ferramientes pa falar d'esi dolor?

— Xusto, eso ye. Quiciabes ta menos representao —nel cine, nes series, nos llibros que lleímos— el final d'una amistá y, de sópitu, cuando te lu atopas, nun tas preparada pa enfrentate a lo h.odida que quedes. Toes sabemos cómo comportanos cuando nos dexa un noviu, pero coles amigues… el duelu ye un misteriu, ¿non?

— ¿Qué vos dexaba cuntar MIAU que tovía nun esplorarais en No lo volveré a hacer? ¿Camudó la vuestra manera de componer al abordar les ruptures d'amistá?

— Camudó como lleva camudando dende que empezamos, nel sentíu de que Shego foi evolucionando y mutando nes sos formes de facer. MIAU dexónos conocenos un poco más como amigues: saber qué nos duele, qué coses concretes nos dexaron un poco tocaes nes nueses relaciones pasaes, qué mieos tenemos dempués d'eso, cómo nos prestaría tomanos los dolores, etc. Son coses que tuvimos que cuntanos les unes a les otres pa escribir estes canciones.

— Los vuestros cantares entemecen rabia, humor, ironía y vulnerabilidá. ¿Resultavos más fácil falar de les coses que duelen cuando les convertís en cantares o hai esperiencies que cuesta más tresformar en música?

— Too ye susceptible d'acabar convirtiéndose nun cantar. Hai coses que llegamos a entender del too dempués d'escribiles y tocalas munches veces.

— En munches de les vueses lletres hai una forma de cuntar les relaciones personales que s'alloña de la idealización romántica. ¿Creéis que tovía hai cierta presión pa representar l'amor d'una manera determinada nes canciones?

— Hai música, perspectives y formes d'escribir tan variaes que nun sería xusto facer esi análisis. Hai xente diciendo coses divertidísimes, coses que nunca se dixeron, abordando l'amor con gracia y sofisticación, con brutalidá… Trátase de dar con daqué que te fale directamente a ti.

— Dacuando rellacionáisvos col punk-pop y el rock alternativu, pero na vuestra música hai espaciu pa soníos y rexistros distintos. ¿Incomódavos que vos encasillen nuna etiqueta o necesitáis partir d'un territoriu reconocible pa depués esperimentar?

— Nun pensamos muncho nel xéneru que facemos. La verdá ye que lo único que sabemos ye que nos presta tocar la guitarra, el baxu y la batería. Too lo demás ye siempre bienvenío, pero ye verdá que casi siempre empezamos les canciones a partir d'ún d'estos instrumentos, y eso condiciona un poco'l procesu y el soníu. Dempués d'eso, tamos abiertes a cualquier cosa que nos funcione na producción. La verdá ye que nos presta probar coses y disfrutamos muncho del procesu de producir y entemecer los temes.

— Nos últimos años aumentó la presencia de muyeres na música alternativa, anque la igualdá nos festivales y nos escenarios sigue siendo un tema de debate. ¿Notasteis cambeos reales na industria o tovía hai torgues que se repiten?

— Non, síguennos preguntando lo mesmo en toles entrevistes.

— Los vuestros cantares nun intenten necesariamente resultar amables nin dar una imaxe perfecta de quien les escribe. ¿Sentís que hai más llibertá pa amosase contradictories o imperfectes o tovía se-yos esixe a les artistes una determinada imaxe pública?

— Nós sentímonos bastante llibres pa facer lo que facemos como queremos facelo. Si nun fuera asina, probablemente nun lo fadríemos, y yá ta.

— El próximu 24 d'ochobre vais actuar en Tribeca Live, n'Uviéu, dientro de Directos Vibra Mahou. ¿Qué vos ufierta una sala de conciertos que nun atopáis nun festival?

— La posibilidá de conectar cola xente de manera más directa, quiciabes. Hai una emoción y un tipu d'atención nuna sala que puede resultar difícil atopar nun festival, porque'l contestu y la cantidá d'estímulos son distintos.

— Nuna xira repítense los cantares, los desplazamientos y les rutines, pero cada públicu ye diferente. ¿Qué necesitáis que pase nun conciertu pa salir del escenariu cola sensación de que valió la pena?

— Pasalo verdaderamente bien, que pasen coses ente nós nel escenariu, trabayar col nuestru equipu, al que queremos, y que fai que tamos comodísimes… Esi tipu de coses.

— Dempués de publicar No lo volveré a hacer, MIAU y percorrer distintos escenarios, ¿en qué momentu creativu vos atopáis agora? ¿Tais pensando yá en nueves canciones o preferís dexar que esti trabayu siga creciendo en directo?

— Dempués de MIAU vien un discu. Tamos trabayando nél con muncho procuru, como siempre.

---

---

---