Comisariada por Semíramis González, la esposición ye una propuesta de resistencia crítica y poética al traviés d'un percorríu per trece instalaciones del artista asturianu.
28 oct 2026 . Actualizado a las 12:49 h.LABoral Centru d'Arte y Creación Industrial presenta «La tempestad», una esposición entamada conxuntamente con CentroCentro. La amuesa propón un percorríu pela obra del artista Avelino Sala a mou d'exerciciu de resistencia crítica y poética.
La esposición esplégase como un campu de tensiones: ente l'amenaza y la fraxilidá, los símbolos heredaos y los nuevos imaxinarios, y ente los xestos del poder y les resquiebres per onde se filtren otres narratives. Al traviés de trece instalaciones, Avelino Sala cuestiona la realidá cultural y social contemporánea y aborda delles de les contradicciones del nuesu tiempu, dende les migraciones hasta la crisis ambiental, la igualdá de xéneru o les paradoxes del capitalismu.
Les obres qu'integren l'amuesa interpelen a cuestiones actuales ensin perder de vista una concreción estética precisa y curiada. La inauguración cuntará con una visita guiada a la esposición xunto al propiu artista y la comisaria. Amás, la Asociación d'Amigos/es de LABoral, dientro del programa PequeLAB, entama'l taller gratuitu pa neños y neñes «Tresformemos el mundu como artistes», desendolcáu en collaboración con Kamante Teatro. Esta actividá dexará a les families asistir a la inauguración mientres la reciella participa nuna propuesta venceyada a la esposición.