El Conseyu d'Estudiantes de la Universidá llama al paru académicu coincidendo cola fuelga xeneral
AGORA
L'accesu a la educación superior, la permanencia nos estudios y les oportunidaes de desenvolvimientu personal y profesional del estudiantáu atópense estrechamente vinculaos a les sos condiciones materiales de vida
30 oct 2026 . Actualizado a las 17:23 h.El Conseyu d'Estudiantes de la Universidá d'Uviéu convocó una xornada de paru académicu xeneral pal próximu miércoles, 11 de payares del 2026, coincidendo cola convocatoria de fuelga xeneral en defensa del accesu a una vivienda algamadiza y d'unes condiciones llaborales y salariales dignes. L'accesu a la educación superior, la permanencia nos estudios y les oportunidaes de desenvolvimientu personal y profesional del estudiantáu atópense estrechamente vinculaos a les sos condiciones materiales de vida.
La creciente dificultá p'aportar a una vivienda en condiciones económicamente asumibles, asina como la necesidá de disponer d'unes condiciones llaborales y retributives fayadices, constitúin esmoliciones que tescienden l'ámbitu puramente académicu, pero qu'inciden directamente na posibilidá de cursar estudios universitarios en condiciones d'igualdá, abondaron. Asina, consideren qu'estes circunstancies adquieren especial relevancia pa los que tienen de movese del so llugar de residencia habitual pa estudiar, los que compatibilicen la so formación con una actividá llaboral y pa los que encaren la so incorporación al mercáu de trabayu.
Per aciu esta convocatoria, el Conseyu d'Estudiantes quier espresar la so esmolición por estes dificultaes y poner de manifiestu la conveniencia d'impulsar, dende'l diálogu y la collaboración institucional, midíes que favorezan l'accesu a una vivienda algamadiza, unes retribuciones llaborales dignes y unes condiciones de vida compatibles col desenvolvimientu d'un proyectu académicu, profesional y personal autónomo.
Los que opten por nun secundar la convocatoria van caltener dafechu'l so derechu a recibir la docencia programada, que la so garantía correspuende a les autoridaes académiques, calteniéndose sía que non les esixencies d'adquisición de conocencies y competencies propies de les enseñances universitaries. El Conseyu d'Estudiantes va velar paque la xornada desenvuélvase con normalidá, respetu a los derechos de tola comunidá universitaria y fayadiza información al estudiantáu, calteniendo los calces de coordinación institucional previstos reglamentariamente, informa Europa Press.