La Conseyería quier fomentar el sentíu d'identidá y pertenencia al centru nos futuros institutos de La Florida, La Fresneda y La Corredoria
19 jun 2019 . Actualizado a las 14:02 h.Un nuevu modelu educativu, centráu nuna escuela inclusiva, con metodoloxía docente anovadora, espacios modernos pal aprendizaxe y un observatoriu de convivencia. Estes son les llínees xenerales que plantega la Conseyería d'Educación y Cultura nos futuros institutos que se van construyir en La Florida, La Fresneda y La Corredoria.
Van ser centros qu'apuesten por una escuela inclusiva, con un enfoque integral pa consiguir l'ésitu de tol alumnáu; centros que se comprometan con unos valores fundamentales que representen el deséu de fomentar la participación y la convivencia positiva de tola comunidá educativa.
Dientro del Proxeuto Espacios, nel que trabaya una ventena de profesores de centros públicos, acaba de presentase'l documentu Actuaciones para una escuela inclusiva, comprometida con una sociedá más xusta, participativa, solidaria y sostenible, atenta con retos sociales, culturales y medioambientales d'Asturies.
Los oxetivos, según el documentu, son “fomentar el sentíu d'identidá y pertenencia al centru ente toles persones que trabayen o estudien nel mesmu, amenorgar la burocracia, con una comunicación más axilosa y efeutiva; ameyorar la participación en tomar de decisiones y consiguir un ambiente de respetu y enfotu”.
Pa ello, van diseñase espacios de rellación y participación y con autoxestión pol alumnáu y va ponese en marcha un Cuadiernu de Vida, como plan de desenvolvimientu personal dende 1º de la ESO hasta la salida del centru. Tutoríes, asamblees d'aula, talleres y más actuaciones participatives son dalgunes de les iniciatives.
El modelu d'escuela inclusiva tamién tien un Observatoriu de convivencia pa favorecer el diálogu como estratexa nel resolvimientu de conflictos. L'observatoriu va incluyir un rexistru de conductes del alumnáu, que van dende actuaciones qu'alterien o torguen el trabayu docente, falta de collaboración, ausencies de clase, daños a les instalaciones, agresiones físiques o morales, humildaciones, inxuries, ofienses, grabaciones d'imaxes o soníos, etc. L'oxetivu final ye tener un diagnósticu pa ellaborar propuestes de meyora.