Inaciu Galán: «La oficialidá yá nun ye una cuestión minoritaria»

Inaciu Galán (Xixón, 1986) dexa de ser presidente d’Iniciativa pol Asturianu güei, dempués de dos mandatos. La organización celebra güei el Congresu del que saldrá’l so sustitutu o sustituta.

 -Ocho años al frente d'Iniciativa pol Asturianu, si tuviera qu'escoyer una frase, ¿qué resumiría estos dos mandatos?

-Consiguimos avanzar na construcción del consensu social y políticu en favor de la oficialidá, esto ye, del futuru del asturianu.

-¿Siéntese satisfechu del llabor realizáu dende Iniciativa pol Asturianu?

-Muncho, siempres queden coses pendientes, pero consiguimos da-y otra imaxe a la reivindicación llingüística, más positiva, más d'alcuerdu y de construcción de complicidaes cola sociedá y colos partíos, que d'enfrentamientu, que de conflictu. Y gracies a esa forma de trabayar güei podemos falar de qu'esta ye una reivindicación asumida de forma mayoritaria y que sobre too, nun xenera refugu ente la mayoría de los asturianos y asturianes. 

 -¿Cuála cree que foi la mayor aportación de la organización al impulsu de la llingua asturiana?

Paezme que la idea de que la esmolición pol futuru del asturianu y la necesidá d'oficializalu nun ye una cuestión d'un sector ideolóxicu concretu foi ganando enteros. Güei la oficialidá ye una cuestión programática pa les fuercies polítiques más relevantes n'Asturies y creo que neso tuvo muncho que ver la forma na que fiximos el trabayu nestos años, construyendo consensu, xenerando simpatía, conciencia llingüística, de forma amable, ensin buscar conflictu, sinón alcuerdu. 

-¿Qué diagnósticu podemos facer del asturianu güei? ¿Cuála ye la so situación?

Socialmente tien una mui bona consideración, la meyor que tuvo nunca. Amás, les encuestes falen de que'l procesu d'escolarización, y con tolo probe que foi, sirvió pa qu'esista una parte considerable de la sociedá que güei ta alfabetizada nel usu del asturianu escritu. Cada vegada asúmese más la necesidá de da-y futuru al idioma, la oficialidá yá nun ye una cuestión minoritaria, pero siguimos perdiendo falantes, eso ye obvio. Faen falta más midíes de normalización y anque pue facese más nel marcu actual, ensin oficialidá ye imposible facer tolo que fai falta. 

 -Una de les cuestiones que se ponen de relieve ye la baxa escolarización, ¿qué falla?

En primaria, onde nun se pon a les families frente decisiones absurdes, la matrícula ye mui bona. En secundaria, onde la materia tien de competir con francés y otres asignatures, la cosa empeora. Y en Bachilleratu, onde nin cuenta pa la EBAU, ye dramático. En munchos centros ponense dificultaes. Tócanos xestionar reclamaciones de families tolos años y en munchos centros. Sigue ensin garantizase la enseñanza en tolos centros con verdadera llibertá. Y bono, la idea de que les families tengan d'escoyer ente estudiar una llingua estranxera y la propia ye alloriante y antipedagóxica. Nós creemos que l'asturianu tien de ser una asignatura más del currículu, normal, ensin más, como lo ye'l castellán o l'inglés, plástica o matemátiques. 

-¿Cree que ta asumida pola sociedá la necesidá de la normalización del asturianu?

Eso mos dicen les encuestes y eso percibo na mayoría la xente. Y ye verdá que llevamos munches décades sintiendo mensaxes contra l'asturianu dende les instituciones. Hai que facer más pedagoxía, los representantes públicos tienen que dexase ver falando asturianu muncho más. Y claro, necesitamos unos medios públicos n'asturianu que-y dean normalidá al idioma. A naide-y estraña que se fale asturianu nel chigre o en casa, pero sacalo a otros ámbitos choca al principiu, porque se-y robaron esos espacios al asturianu. Pero tenemos la esperiencia, cuando se pon a funcionar con normalidá una llingua, la xente asúmelo con naturalidá. 

-Si atendemos al informe de l'Academia de la Llingua Asturiana del añu pasáu, el 64% de la opinión pública asturiana considera que les instituciones nun faen nada o faen poco pol caltenimientu y promoción del asturianu, ¿ta d’acuerdu?

-Faen mui poco. Dicir nada sedría inxusto, pero ye mui mui poco. Tolos pasos que se dieron alantre diéronse gracies al impulsu de les entidaes y la sociedá, y les instituciones siempres fueron detrás. Agora que vamos tener un Gobiernu d'Asturies y cuasi setenta gobiernos de conceyu en manes de partíos que defenden la oficialidá, tienen que facese polítiques de normalización muncho más actives y ambicioses. Hai que tar vixilantes en qu'esi apoyu a la oficialidá nun quede namás nun compromisu sobre'l papel. 

 -Cambéu políticu, ¿qué-y pide y qué espera del nuevu gobiernu que nes próximes selmanes va salir de la Xunta sobre'l asturianu?

-Que dende'l primer momentu lleven al máximu l'aplicación de la Llei d'Usu del asturianu de 1998, con tantes coses pendientes, y que trabayen pa consiguir un consensu y facer la reforma del Estatutu d'Autonomía qu'incluya la oficialidá. Vamos tener un presidente al que yá vimos en dalguna ocasión animándose a falar n'asturianu en públicu, y eso habría ser más habitual. Pertenez a otra xeneración diferente a la de Javier Fernández, que ye conocío que yera falante d'asturianu en privao, pero que nunca quixo dar el pasu de facelo. Tien la oportunidá de facer hestoria y convertise nun presidente que marque la diferencia col asturianu.

-¿Qué opina del modelu de oficialidá «amable» que defende Adrián Barbón?

Nun conozo otra forma de facer la oficialidá que nun seya amable. Naide quier una oficialidá agresiva. Queremos una oficialidá que s'afaye a les característiques d'Asturies, que seya progresiva, que se faiga con consensu, que seya más llibertá pa la ciudadanía. Y nesi modelu habrá munchos detalles que son más de xestión del día a día y sobre too de la llei de normalización que se faiga dempués. Que naide piense que la oficialidá va suponer nengún problema pa naide. Ye una midida llegal, prevista pola Constitución española, y qu'Asturies namás-y va traer beneficios culturales, sociales y hasta económicos, porque toles llingües son un elementu tamién con un valir y que xeneren actividá económica. 

-¿Hai posibilidaes de que Foru recupere la so posición de sofitu a la oficialidá y faiga posible la reforma del Estatutu d'Autonomía?

-Yo confío en que sí, y pa eso tamos trabayando. Foru yá llevaba nel so programa la oficialidá de forma muncho más clara y al mio paecer fueron les circunstancies polítiques del momentu les que fixeron que falaran de falta de consensu. Nun son bones compañeres les prieses nin les improvisaciones. Cuando abramos un procesu de reforma estatutariu hai qu'asegurar que tenemos los votos pa facelu, sinón ye un desgate y una forma de quemar cartuchos que nun tien sentíu. Y Foru, y Carmen Moriyón, que falaron va poco de ser un partíu rexonalista, de dar un xiru, creo que tendrán más ésitu n'Asturies si vuelven a les posiciones que fixeron que fueran el partíu más votáu n'Asturies y en munchos conceyos. 

-¿Cree que la posición del PP n'Asturies, frente a la que caltienen n'otres comunidaes con llingua propia, ye un problema de persones más que de sigles polítiques?

- Espero que sí. Enfótome en que Mallada tenga otra posición distinta a la de Cherines, que depués de pidir la oficialidá en 1998, agora tien una obsesión malsana y qu'amás nun llevo al partíu a nengún ésitu electoral. Va poco, nel nuesu Seminariu sobre la oficialidá, tuvimos equí a Víctor Manuel Vázquez Portomeñe, padre del estatutu gallegu y conseyeru con Fraga, un hestóricu del PP. Esplicábanos cómo en Galicia’l PP garró la bandera del gallegu con tola normalidá, y nun entendía qué pasaba col PP d’Asturies nesta cuestión. Yo tampoco soi a entender la razón de qu’a un llau del Eo tengan una postura positiva y al otru radicalmente contraria. Gabino de Lorenzo 

-En casu de nun llograr la oficialidá, ¿qué cuestiones cree irrenunciables pa siguir avanzando?  

Anque la llogremos, nun va ser mañana, ye un procesu que va llevar un tiempu. Asina qu'en tou casu ye necesario desarollar la Llei d'Usu dende'l primer día, llevándola a les máximes posibilidaes, mientres de forma paralela siguimos, tola sociedá y les instituciones, trabayando pa consiguir la oficialidá. 

---

---