La Xunta pola Defensa de la Llingua Asturiana (XDLA) y la Plataforma pola Oficialidá del Gallego-asturiano defenden qu'estes dos llingües sían oficiales
25 jun 2019 . Actualizado a las 10:21 h.La Xunta pola Defensa de la Llingua Asturiana (XDLA) y la Plataforma pola Oficialidá del Gallego-asturiano soliciten que l'asturianu y el gallego-asturianu tengan un "tratu igualitariu" nuna posible reforma del artículu cuartu del Estatutu d'Autonomía qu'incluyera la oficialidá.
Nuna declaración conxunta, les dos asociaciones defenden qu'estes dos llingües sían oficiales y que depués una llei de la Xunta Xeneral fixe les zones d'usu predominante de cada llingua.
Nesi sentíu, les dos organizaciones critiquen la propuesta d'artículu cuatro de l'Academia de la Llingua Asturiana onde la oficialidá del gallego-asturianu restrínxese al so ámbitu territorial.
Pa les organizaciones, la propuesta de l'Academia "reconoz la oficialidá del asturianu tamién nel territoriu onde la llingua propia ye'l gallego-asturianu, pero non al revés", polo que piden una redacción "radicalmente igualitaria" cola oficialidá de les dos "que vendría a concretase depués nuna llei de normalización que marcara los ámbitos d'usu d'entrambes llingües".
"Dicir qu'una d'elles va ser oficial en toa Asturies y nun lo contemplar pa la otra señala yá de mano una preminencia del asturianu sobre'l territoriu del gallego-asturianu que nun pue más que llevantar rocees na comunidá de falantes de la más pequeña", indiquen.
Per otru llau, tanto la XDLA como la Plataforma consideren un error introducir nel debate sobre la oficialidá "una batalla terminolóxica absurda" con nomes nuevos pal gallego-asturianu. Una denominación que, recuerden, tien tradición filolóxica y llegal.
"Nesta cuestión pidimos respetu pol camín andáu y sobre manera responsabilidá a instituciones y partíos políticos", señalen, p'acabar pidiendo a los partíos políticos con representación na Xunta Xeneral encarar la reforma del Estatutu pa incluir la oficialidá.