L'órganu diz que «cronificóse la falta d'oportunidaes pa los mozos, condergando a la mocedá asturiana a la emigración, el desempléu o la precariedá»
28 jun 2019 . Actualizado a las 10:35 h.El Conseyu de la Mocedá del Principáu d'Asturies emitió es una nota de prensa pa comentar la "sangría demográfica" que carez Asturies y que se reflexa nos últimos datos de población publicaos pol Institutu Asturianu d'Estadística (INE).
Pal presidente del Conseyu, Álvaro Granda, la situación ye "murnia" y "esmolecedora", porque Asturies lleva perdiendo población ocho años siguíos. "Cronificóse la falta d'oportunidaes pa los mozos, condergando a la mocedá asturiana a la emigración, el desempléu o la precariedá", llamentó'l dirixente del Conseyu.
Por eso, dende l'organismu esperen que dende'l gobiernu asturianu nuevu y el conxuntu de los actores políticu y social de la sociedá asturiana impúlsense polítiques "coordinaes y tresversales de mocedá". Granda, sicasí, matiza que nun ye bien optimista, porque na campaña electoral los partíos malapenes falaron de polítiques de mocedá.
Dende'l Conseyu consideren necesario apostar pola investigación pública, la correcta implantación de la formación profesional Dual, la dinamización y recuperación del patrimoniu cultural, natural y industrial, amás del apueste decidíu poles tecnoloxíes nueves, como sectores estratéxicos que dexen abrir puertes a la incorporación al mundu llaboral de mozos en situación de desempléu o facilitar la vuelta de la mocedá asturiana emigrante. A eso, sumen la defensa de la industria asturiano y el refuerciu de los programes d'apoyu a la creación artístico y cultural.