El conceyu prepara trés díes de fiesta pola llingua con documentales, teatru, presentaciones de llibros, dances y bailles
06 jul 2019 . Actualizado a las 21:46 h.Bimenes prepara la fiesta pola Oficialidá, qu'anguaño cumple 23 ediciones. El programa d’actividaes arranca’l xueves 4 de xunetu cola proyeición de dos documentales: «La vida ensin oficialidá» y «El valir económicu d’una llingua», que reflexen les repercusiones económiques positives qu’acarretaría esa oficialidá p’Asturies. Dambos documentales tán producíos por Iniciativa pol Asturianu y van ser presentaos por Inaciu Galán, ex Presidente d’esta asociación, a les 18:30 hores, na Casa Cultura de Santuyano.
Ese mesmu día, un pocu dempués, a les 20:00 hores nel mismu sitiu, va presentase’l llibru «Todo a cien. 100 lletres de 100 cantares», del músicu fundador de Los Berrones y escritor Tante Blanco. El llibru recueye cien lletres de cien cantares escritos a lo llargo de delles décades, a les que se-yos amesta un comentariu alredor de les circunstancies que les vieron nacer.
El programa de la XXIII Fiesta de la Oficialidá de la Llingua Asturiana cuenta tamién con teatro, cola representación, el vienres, 5 de xunetu, de la obra «Una apuesta que nin pintada», a cargu del grupu de teatro de La Puente Arriba.
El Día Grande, el sábadu 6 de xunetu, va celebrase el pregón a cargu de l’actriz María Cotiello, a las 12:30 hores. Dempués, va baillase la danza de la Oficialidá y pasacais y baille tradicional, xira popular y concursu d’escanciadores. La canción asturiana, con Alicia Villanueva y Carlos Velasco, va abrir les actuaciones musicales de pela nueche na Fiesta de la Oficialidá, coles dances de Bandi-Ne, Panderetes de Fitoria y Cantaruxare.