El Festival Sol Celta llena de música les cais del cascu históricu hasta'l domingu
01 jul 2019 . Actualizado a las 22:27 h.El Festival Sol Celta vuelve a Avilés na so VIII edición colos soníos más tradicionales y delles actividaes culturales pa tolos públicos dende esti llunes hasta'l domingu nel barriu de La Villa, les places d'Alfonso VI, Carlos Lobo y El Sol, amás de na cai La Ferrería.
Según confirmó'l Conceyu d'Avilés en nota de prensa, la música ye la protagonista del festival, con hasta 25 actuaciones programaes. El folk ye la principal seña d'identidá d'esti certame, y el públicu va poder esfrutar de grupos asturianos, amás de llegaos de Galicia, de Llión y del País Vascu. Nun va ser l'únicu estilu musical qu'ufierte'l Sol Celta, tamién hai espaciu pa ska, rock y mesmo soul.
Una de les actuaciones estelares va ser la nueche del sábadu 6, na plaza del Sol. Manolo Peñayos, la metá del míticu grupu Nuberu va ser el protagonista a partir de les 22.30 hores. Cola so guitarra, va interpretar el so repertoriu, pero tamién dalgunos de los himnos interxeneracionales de Nuberu. Tamién participen anguaño bandes y solistes del prestixu d'Ún de Grao, Alienda, La Tarrancha o Caldo y Os Rabizos.
L'actividá nun se circunscribe a la música, que va sonar la selmana peles tardes y les nueches, y el sábadu 6 y el domingu 7, tamién dende les 13 hores en sesión vermú. Una edición más, vuelve'l Mercáu Tradicional y d'Artesanía, nes cais Xovellanos y La Ferrería, y les places de Carlos Lobo y Alfonso VI.
Los visitantes van poder asistir a presentaciones de llibros, como 'Cristino García Granda', d'Andrés Castillo, esti llunes a les 18.30 hores, y charres como la de la Lliga Celta d'Asturiés, el miércoles a les 18.30 hores nel Palaciu de Valdecarzana.
El teatru va tener un sitiu especial na plaza del Sol, de llunes a xueves pela tarde, y el domingu 7, cola representación de 'Aquí no paga nadie', de Darío Fo, nun montaxe de Garrapiellu Teatru.