El deporte universitariu asturianu collecha victories en pista y mar

A. I.

ACTUALIDÁ

L'equipu de la institución foi'l meyor na clase II de la regata Isastur-Universidá d'Uviéu y los participantes nel Campeonatu d'España sub 23 tornaron con dos medayes de bronce

04 jul 2019 . Actualizado a las 13:05 h.

El deporte universitario collecha les primeres victories del branu, con trunfos na regata Isastur-Universidá d'Uviéu celebrada en Xixón y con dos medayes de bronce nel Campeonatu d'España sub 23 d'Atletismu en Tarragona, el fin de selmana.

Nel II Memorial Daniel Ponte, celebráu na badea de Xixón, la victoria na clasificación de la clase I y na xeneral foi pa Taxus Mediu Ambiente. L'equipu Universidá d'Uviéu-Grupu Isastur', dirixíu por Roberto Bucetas, foi'l meyor na clase II y el ‘Espumeru', con Antoni Bauza a la caña, llogró la so enésima victoria na clase III. 

La competición volvió ser unu de los referentes deportivos del entamu del branu na rexón, qu’enllenó de coloríu Xixón coles veles de les embarcaciones más destacaes de la clase cruceru d’Asturies. El 'Taxus Mediu Ambiente' tuvo secundáu na clasificación de la clase I pol 'Great Sailing One', de Fernando Alonso, que defendía'l títulu, y pol 'Bullbox', de Lluis Noguera.

La Universidá d'Uviéu-Grupu Isastur' apoderó la clase II, na qu'el 'Wanted', de Ricardo Simal, y el 'Orbayu', de Miguel Suárez, ocuparon la segunda y tercer posición, respectivamente.

 Los tripulantes del ‘Espumeru' recordaron a Daniel Ponte de la meyor forma posible: cola victoria na clase III. El ‘Leónidas', de Juan Quevedo, concluyó la competición na segunda plaza. El ‘Ita II', de Pedro Guerra, acabó terceru.

N'otru llugar, nel Campeonatu d'España sub 23 d'Atletismu en Tarragona, los representantes de la Universidá d'Uviéu tornaron a casa con dos medayes de bronce.

Diego Escuderu, dempués d'espachar una gran semifinal nos 800 metros, volvió amosase bien sólidu na final na que caltuvo la so opción al títulu hasta los últimos metros, anque foi batíu polos corredores del Fútbol Club Barcelona Pablo Sanchéz-Valladares y Eduardo Romero y acabó en tercer posición. Con esti bronce, el deportista verdinegru entra na élite del mediofondo nacional de la categoría, informa la Universidá d'Uviéu.

Otra de les opciones estudiantiles de xubir a los caxones en Tarragona taba nel equipu de relevos 4x100 metros, a pesar de cuntar cola baxa del so integrante más rápidu esta temporada y campeón d'España Universitariu del hectómetru, Manuel Palanco. Entá asina, el cuartetu formáu por Philip Okeiyi, Jaime Álvarez-Hevia, Luis Álvarez y Marcos Barriga realizaron una gran prueba y cruciaron la meta en tercer posición, atropando una nueva medaya pa la Universidá d'Uviéu.