Bimenes tira pola Oficialidá

El día grande de la fiesta del conceyu conviértese nun actu reivindicativu nel planu políticu

Fiesta de la Oficialidá
Fiesta de la Oficialidá

Bimenes celebró güei la Fiesta de la Oficialidá con música, baille, concursos, xuegos y compromisos políticos. Tantu'l PSOE como Podemos aprovecharon el día de celebración pa ratificar el so respaldu a la oficialidá. El pregón, al cargu de María Cotiello, abrió'l Día Grande de la fiesta, que celebró los sos primeros actos el xueves. 

El secretariu xeneral de la Federación Socialista Asturiana y candidatu a la Presidencia del Principáu, Adrián Barbón, comprometiose a trabayar pa “salvar al asturianu de la so desapaición”. Recordó que "la llingua de los nuesos güelos hai que treslladala tamién a los nietos y nun puede perdese".

Barbón incidió en que la coincidencia del PSOE, IU y Podemos pola oficialidá ye total y qu'otra cosa va ser el modelu qu'unos y otros quieran aplicar p'afigurala y poder salvar la llingua como patrimoniu inmaterial d'Asturies que ye.

Pela so parte, el diputáu rexonal de Podemos Rafael Palacios aseguró que la oficialidá "va ser puesta por Podemos enriba de la mesa en cada alderique".

El conceyu de Bimenes convirtióse nel puntu d'alcuentru pa los colectivos que reivindiquen la oficialidá del asturianu. Dempués del pregón, celebróse la danza de la oficialidá. Pasacalles, bailles tradicionales, la xira popular, el concursu d'escanciadores y la música completaron la xornada.

Comentarios

Bimenes tira pola Oficialidá

Cola ayuda de