¿Va ser la oficialidá un motor pa la industria cultural de la rexón?

Especialistes defenden na Semana Negra'l beneficiu económicu y social de la llingua y  la oficialidá como la única alternativa pa la so supervivencia

Participantes na mesa sobre la oficialidá.
Participantes na mesa sobre la oficialidá.

La oficialidá como elementu de cohesión social y motor de la industria cultural d’Asturies. Este foi'l filo conductor de la mesa redonda celebrada ayeri na Semana Negra de Xixón y na que tolos participantes coincidieron en que la oficialidá ye la única alternativa pa la supervivencia del asturianu y la meyor vía p'aprovechar una singularidá de la rexón que va contribuyir a xenerar riqueza, non solo económica sinón tamién social.

María Luz Pontón, Secretaria d’Educación, Universidaes y Normalización Llingüística de la FSA-PSOE exerció de moderadora del alcuentru nel que participaron los periodistes Inaciu Galán y Cristóbal Ruitiña, la escritora Berta Piñán, el profesor Víctor Suárez y l'actriz Eva Vallines.

Cuasi 2.500 empreses n'Asturies viven de la cultura. Ye la cifra que María Luz Pontón punxo sobre la mesa pa de siguío esbillar datos d'otres comunidaes autónomes y países que demuestren que “la oficialidá de les llingües propies supón un beneficiu económicu pa la comunidá autónoma”.

¿Y qué pue suponer la oficialidá del asturianu? Pa Inaciu Galán, qu'hasta apocayá ocupó la presidencia d'Iniciativa pol Asturianu, “la oficialidá aportaría visibilidá, y supón tamién poner a trabayar un recursu económicu que tien valor añadíu”. Al so paecer, les industries culturales tan lligaes a un llugar y eso xenera empléu y riqueza. “La oficialidá va permitir que les empreses puedan optar a ayudes y abre una puerta, un camín, nel que tendría espaciu la llingua pa esplotar esta materia primero”.

Berta Piñán recordó qu'hai delles dimensiones nesti tema y una de les más importantes ye la cohesión social. “Una sociedá cohesionada pue tener otres mires. La llingua fai de ponte ente lo que nos representa, la tradición y el saltu escontra'l futuru”

La escritora y profesora reivindicó la ilusión del proyectu colectivu. “Precisamos proyectos colectivos como esti, y la oficialidá da-y un ámbitu a esti elementu de cohesión social que ye la llingua”.

Pa Víctor Suárez, responsable de política llingüística d'Izquierda Xunida Asturiana, “ye verdá que la llingua asturiana ye una fonte de derechos y un patrimoniu cultural qu'hai que caltener pa xeneraciones futures”. Punxo sobre la mesa distintos exemplos del valor económicu que supondría la oficialidá, como'l casu del Eusquera, que xenera más de 4.500 empleos y 407 millones d'euros. “Nun tenemos que dexar de llau esta oportunidá”, y recordó que se ta perdiendo financiamientu estatal, unos 20 millones d'euros tolos años por nun ser una llingua oficial. Apostó tamién por recuperar l'autoestima al traviés de la llingua y utilizar la televisión pública como elementu importante pa la normalización llingüística.

 Eva Vallines consideró que “la oficialidá ye la única oportunidá de que la nuesa llingua sobreviva, ye un sofitu a la creación y promoción de lo nueso y tendríamos accesu a munchos recursos qu’agora tán restrinxíos a comunidaes con llingua oficial”.

Pa Cristóbal Ruitiña la respuesta a qué aporta la oficialidá ye bien clara: “Supón que la industria cultural pase de cero a cien, y que s'abandone ciertu amateurismu pa convertise nun motor, nun pegollu”. La oficialidá ye reconocer el derechu a falar n'asturianu, porque tenemos un retrocesu históricu, ye una llingua en cierta midida atrofiada, y eso podría revertise. “La industria cultural ye l'agua, l'oxíxenu de les llingües”.

Los participantes nel alcuentru, que cuntó ente'l públicu col candidatu socialista a la Presidencia del Princiapado, Adrián Barbón, coincidieron tamién nel papel de les alministraciones públiques pa garantizar que l’asturianu nun desapaeza, y de los  medios de comunicación como elementos de normalización.

Comentarios

¿Va ser la oficialidá un motor pa la industria cultural de la rexón?