L'Academia de la Llingua ve un «pasu simbólicu de gran importancia» que Barbón usara l'asturianu

El presidente de l'Academia de la Llingua Asturiana, Xosé Antón González Riaño, calificó de "pasu simbólicu de gran importancia" que'l candidatu a la presidencia del Principáu, el socialista Adrián Barbón, usara l'asturianu nel so discursu d'investidura.

El líder socialista usó esta llingua pa invitar a les fuercies de la derecha a qu'acepten "una negociación abierta" sobre la reforma del Estatutu d'Autonomía "p'alcordar un modelu d'oficialidá". Coles mesmes, faló del asturianu y del gallego-asturianu como un "patrimoniu" que s'ha de protexer p'asegurar "la so supervivencia".

Pal presidente de l'Academia, estes palabres muestres "que les coses principien a cambiar" al ser la primer vez qu'un aspirante a la presidencia d'Asturies usa esti idioma na Xunta Xeneral, según un apunte en twitter recoyíu por Europa Press.

Paez que les coses entamen a camudar: ye la primer vegada qu'un aspirante a la Presidencia del Gobiernu d'Asturies @AdrianBarbon emplega l'asturianu na Xunta Xeneral y failo, amás, pa defender la #oficialidá. Pa nós ye un pasu simbólicu de gran importancia https://t.co/g53I9O5La5

— X.A. González Riaño (@xantongr) July 11, 2019

Amás, Riaño punxo en valir que Barbón defendiera la oficialidá, una cuestión que pa l'Academia "ye un pasu simbólicu de gran importancia".

La opinión de González Riañu foi compartida nes redes por distintos representantes de colectivos defensores de la oficialidá, qu'en dellos casos llomaron de xestu históricu'l fechu de qu'un futuru presidente usara l'asturianu nel so discursu d'invistidura.

Un momentu hestóricu, un candidatu a presidente d’#Asturies, Adrián Barbón, apostando pola #oficialidá y faciendo parte del discursu n’asturianu nel plenu d’elección. Hai que siguir construyendo’l consensu pa la oficialidá, y mientres dar pasos... https://t.co/t3jQztkJ9q

— Inaciu Galán (@inaciugalan) July 11, 2019

Discursu hestóricu con conteníu n’asturianu de @AdrianBarbon nel alderique d’investidura na Xunta Xeneral. https://t.co/FELNy99hKX

— Avance (@Avance_Asturies) July 11, 2019

Per otru llau, la Xunta pola Defensa de la Llingua Asturiana sumóse güei a les crítiques de la Plataforma pola Oficialidá del Galego-Asturianu sobre l'alcuerdu robláu por FSA ya IX. Según la organización, les dos fuercies polítiques nun se comprometen cola oficialidá "y namás falen de buscar los apoyos necesarios p'algamar una reforma del Estatutu d'Autonomía que permita establecer esti marcu llegal".

"Nun s'entiende por que la cuestión llingüística ye l'únicu puntu onde s'establez que depende de terceros, porque pa tolo demás nun se fala de la necesidá d'una mayoría parllamentaria o de tener una partida presupuestaria", indicó la XDLA al traviés de nota de prensa.

Per otru llau, pa l'asociación nun ye una novedá la llei pal usu de la toponimia alcordada por FSA y IX, "porque ye dalgo que yá se contempla na Llei d'Usu del Asturianu, que lleven años ensin desarrollar".

Coles mesmes, critiquen que l'alcuerdu d'invistidura nun trata cuestiones como la presencia del asturianu en RTPA "y la necesidá d'aprobar l'alcuerdu-marcu onde s'estableza'l so papel dientro del procesu de normalización llingüística" o del usu tresversal de la llingua en toles estayes de la Alministración autonómica.

Tamién faen referencia a la necesidá d'esparder la ufierta del Plan Pilotu del Asturianu per toles escueles, del apoyu a la industria cultural o del encaxe y la tresversalidá de les competencies de Política Llingüística dientro del organigrama del Gobiernu, "que bien podría pasar a ser una Viceconseyería con delles direcciones xenerales".

---

---