El 90% de los economistes son pesimistes sobre les previsiones de crecimientu d'Asturies

LA VOZ

ACTUALIDÁ

Santiago Álvarez y Miguel de la Fuente
Santiago Álvarez y Miguel de la Fuente

La práctica totalidá piensa que la descarbonización va afectar al futuru de la rexón

16 jul 2019 . Actualizado a las 11:59 h.

Un 90 por cientu de los economistes de la rexón tienen una percepción que podría calificase como 'moderadamente negativa' sobre les previsiones de meyora a curtiu plazu de los indicadores económicos de la rexón, según se pue ver nel primer 'Económetro' ellaboráu pol Colexu d'Economistes.

Ente los factores qu'alerten d'esa previsión, la descarbonización, la presión fiscal, la baxa inversión de los Presupuestos Xenerales del Estáu (PXE) n'Asturies, una previsión de pensiones inferiores a les actuales o unes polítiques d'avieyamientu públiques que ven como poco afayadices.

Asina se recueye na primer edición del 'Económetro' del Colexu d'Economistes d'Asturies y ellaboráu nel primer semestre del 2019 con apoyu de Liberbank y la Facultá d'Economía de la Universidá d'Uviéu. Nel mesmu ufiertaron la so opinión 213 economistes, un 13,65% de los colexaos n'Asturies.

L'informe presentáronlo esti vienres el presidente del Colexu, Miguel de la Fuente Rodríguez, y el vicetesoreru y coordinador del informe, Santiago Álvarez García.

Según se pue ver nos sos datos, l'índiz de confianza na economía asturiana foi de -6,96, lo que se traduz nuna percepción de desconfianza global de los economistes sobre la evolución socio-económica d'Asturies.

Asina, un 57,7% opina que la rexón va tar peor dientro d'un añu, mentes qu'un 58,7% afirma que la situación empioró en comparanza con hai doce meses. Sobre la evolución del empléu, un 49,7% opina que'l desempléu va medrar nel añu próximu.

Ente otres cuestiones recurrentes qu'afecten a la competitividá de la economía asturiana, un 71,3% asitia les infraestructures, dalgo más de la metá apunta al preciu de la enerxía y la presión fiscal, mentes qu'ente'l 25% y el 30% asitia a la inversión n'I+D+i, el desempléu y los costos salariales.

Per otru llau, sobre les cuestiones d'actualidá que puen afectar al curtiu plazu a la situación rexonal, un 90,2% apunta a la presión fiscal, un númberu similar --90,1%-- a los qu'opinen que les pensiones futures van ser peor que les actuales.

Sobre la inversión del Estáu n'Asturies y atendiendo al proyectu de PXE pa 2019, que nun foi finalmente aprobáu, los economistes son mui críticos y un 90,7% apunta a una inversión 'non afayadiza' pa les necesidaes de la rexón. Per otru llau, el 99% indica que les polítiques del Principáu énte l'avieyamientu de la población nun son útiles, informa EUROPA PRESS.

Descarbonización

Ún de les temes que más debate xeneren na sociedá asturiana son les polítiques de descarbonización y l'anunciáu procesu de Transición Enerxética. Pa la práctica totalidá de los economistes asturianos --98,2%-- les polítiques de descarbonización van afectar a la nuestra situación socio-económica.

Miguel de la Fuente esplicó, a entrugues de los medios, que la economía asturiana tovía ta venceyada al carbón, polo que la descarbonización va afectar "a curtiu plazu" y va haber qu'analizar a mediu y llargu plazu la xestión de les polítiques de transición pa especificar si estes son positives o negatives.

Con too, alertó de qu'una 'descarbonización exprés' va ser mala a curtiu plazu. "Supondría mayor desempléu y menor medríaeconómica", esplicó, anque reconoció que'l cambiu ye "irreversible", polo qu'existe la necesidá de buscar alternatives que caltengan y ameyoren l'empléu".

Sicasí, destacó determinaes fortaleces qu'existen n'Asturies, como sufrir delles reconversiones y "salir del pasu", xunto al pesu de la industria química, agroalimentaria, naval o turística.

Nesi sentíu, defendió apostar pol sector industrial y tecnolóxicu, dalgo pa lo qu'apuntó a la necesidá d'aprobar l'Estatutu de les Industries Electrointensives y la política enerxética española tenga "una llinia clara".

Coles mesmes, demandó una mayor inversión n'investigación y tecnoloxía porque, según esplicó, Asturies ye la tercer comunidá con menos inversión, polo qu'apostó por copiar el modelu vascu y aprovechar les subvenciones europees pa esi sector.

Polítiques fiscales

P'acabar, los economistes calificaron la presión fiscal n'Asturies como una de les más altes y reclamaron una "harmonización". "Asturies apostó fuertemente pol estáu de bienestar y nel presupuestu queda poco pa la inversión", esplicó Miguel de la Fuente.

Asina, indicó qu'existe la polémica sobre si'l dineru "ta meyor nel bolsu de los ciudadanos o nel Estáu pa que lo reparta afechiscamente". Nesi sentíu, sentenció que los impuestos "son necesarios, pero dientro d'un ciertu orde".