Amás de los tradicionales cursos de llingua asturiana, la UABRA va cuntar nesta edición con estudios sobre patrimoniu y escritura creativa, conferencies, música y una esposición
17 jul 2019 . Actualizado a las 09:29 h.Un suizu, un nortemaericanu y un catalán van sumase a los asturianos que van participar esti añu nos Cursos y Actividaes Abiertes de la Universidá Asturiana de Branu (Uabra), que van desarrollase ente los díes 29 de xunetu y 9 d'agostu y nos van participar 150 persones.
Trátase d'un proyectu lleváu alantre gracies a la collaboración ente l'Academia de la Llingua Asturiana, la Universidá d'Uviéu y el Conceyu de Cangas del Narcea, sitiu onde se pon en marcha esta iniciativa que tamién s'inclúi ente los Cursos d'Estensión Universitaria de la Universidá d'Uviéu.
Amás de los tradicionales cursos d'asturianu --nivel elemental y avanzáu--, la UABRA acueye nesta edición la primer fase del cursu de gallego-asturianu pa maestros, el de 'Capacitación pa la Traducción al Asturianu' y el de 'Educación y nueves teunoloxíes multimedia'.
Otra manera, como novedá anguaño, la UABRA pon en marcha nesta edición estudios sobre El patrimoniu cultural asturianu. Un averamientu dende l'enguedeyu de lo tanxible y lo intanxible, y De la lletra al testu: taller d'escritura creativa.
Baxo la direición de Cristina Valdés Rodríguez, la UABRA va cuntar con xeres complementaries como les conferencies «L’osu n’Asturies: implicaciones sociales y económiques», de Víctor M. Vázquez (Biólogu y miembru numberariu del RIDEA), el 30 de xunetu; «Úa television pública al servicio d’Asturias», con Cristóbal Ruitiña Testa (Periodista y redactor de la RTPA), el 1 d’agostu; y «La política de defensa n’Europa. Análisis xeopolíticu y alternatives», de Raúl Suevos (Analista de Seguridá Internacional), el 6 d'agostu. Música de «L-R» y «A comuna del barruzo», y la esposición «Voces. La llingua asturiana al traviés de los sieglos», na Casa de la Cultura «Palaciu d’Oumaña» de Cangas, completen el programa.