Les humanidaes ganen terrenu ente los nuevos universitarios

Filosofía, Arte, Estudios Ingleses o Historia tienen notes d'accesu más altes y mayor demanda que graos d'economía y delles inxenieríes na axudicación provisional de places na Universidá d'Uviéu

Estudiantes nel Milán
Estudiantes nel Milán

Les humanidaes tán ganando posiciones nes preferencies de los universitarios. Los datos provisionales d'accesu a la Universidá d'Uviéu pa'l próximu cursu dibuxen un panorama distintu del que tamos avezaos. Les ciencies de la salú siguen siendo les titulaciones con más demanda y una nota de corte más alta, pero anguaño graos como Filosofía o Historia del Arte precisen una nota d'accesu percima del 6, más elevada que la mayor parte de los estudios d'Economía y Derechu ya inclusive penriba de les inxenieríes, como Mines o Telecomunicaciones, por exemplu.

Si tenemos en cuenta'l númberu de mozos que pidieron estudiar un grau d'artes y humanidaes n'Uviéu alcontramos datos bien positivos pa quien defende que los estudios humanísticos son un valor n'alza pa formar profesionales versátiles y con capacidá d'adaptación al mercáu. El grau d'Estudios Ingleses, dientro de Filoloxía, captó l'interés de 352 mozos, otros 291 pidieron matriculase n’Historia; 294 escueyen Arte; 232 opten pola Filosofía, y 227 moces poles Llingües Modernes y les sos Lliteratures. Inclusive Xeografía o Estudios Clásicos y Románicos, titulaciones que davezu cuntaben con baxes matrícules, anguaño ronden les 70 solicitúes.

Estos datos contrasten con carreres que socialmente se consideren de mayor tirón. Por exemplu, Inxeniería Civil recibió 233 solicitúes; Inxeniería Química Industrial, 174 inscripciones; Forestales, una de les incorporaciones de la última década, recibe 148 pidimientos; Marina, 132; y Mines, por casu, cuenta con 104 mozos preinscritos.

Les humanidaes tamién superen a otres carreres clásiques como Xeoloxía, que recibe 105 solicitúes, o dellos graos de maestru. Precisamente en Maxisteriu los graos d'Educación Primaria y Educación Infantil siguen captando l'interés de los estudiantes, con más de 900 y cuasi 700 solicitúes, respectivamente, y una nota d'accesu percima del 7.

Les ciencies de la salú siguen siendo les titulaciones con una demanda más alta y notes de corte penriba de 12, na mayor parte de los casos, como Medicina, Odontoloxía y Enfermería, que lideren los estudios con más demanda y de peor accesu. Tamién percima del 12 asítiense estudios como'l doble grau de Matemátiques y Física, Biotecnoloxía y Matemátiques.

La Universidá d'Uviéu fixo públicos güei los datos provisionales de la primer axudicación, dempués de que pudieren consultase n'abiertu na web por un fallu informáticu, dos díes enantes de la fecha oficial d'axudicación. Los datos de notes de corte, la información más esperada poles families con estudiantes que superaron la EBAU y que quieren saber ónde llograron plaza, fueron públicos unes hores. En publicando LA VOZ DE ASTURIAS los primeros datos y en desvelando que taben n'abiertu, la Universidá retiró de cada titulación el datu referíu a la nota de corte, que realmente ye la que quier conocer cada estudiante.

Comentarios

Les humanidaes ganen terrenu ente los nuevos universitarios