El Principáu d'Asturies participó na feria de turismu de naturaleza Birdfair Rutland
21 ago 2019 . Actualizado a las 11:59 h.El Principáu d'Asturies participó estos díes na feria de turismu de naturaleza Birdfair Rutland, nel Reinu Uníu, onde s'axuntaron más de 400 empreses y rexones de 90 países, pa promocionase como destín turísticu. Los técnicos asturianos dieron a conocer a los asistentes a la feria, ente otres cuestiones, la posibilidá de ver osos en Cangas y Somiedu.
Según informó'l Gobiernu asturianu, el públicu de la feria, pola que cada añu pasen 25.000 persones, ye «d'altu poder adquisitivu, sensibilizáu col caltenimientu y protección del mediu ambiente, y interesao en buscar llugares desconocíos pa la observación de distintes especies de fauna y flora», informa Europa Press.
Técnicos de la Sociedá Pública de Xestión y Promoción Turística y Cultural del Principáu contactaron en Birdfair Rutland con axencies de viaxe y medios de comunicación especializaos como BBC Wildlife y Bird Watching Magacín y atendieron consultes particulares. L'oxetivu ye ampliar la presencia d'Asturies nos catálogos d'axencies como Birdholidays, Naturetreck, Limosa, Heatherlea y Rockjumper, dada la importancia de la intermediación nesti segmentu, nel que los turistes acuten con muncha antelación paquetes zarraos con tolos servicios incluyíos.
L'espaciu promocional del Principáu, allugáu nel estand de Turespaña, dedicóse a dar a conocer al mercáu británicu destinos como Cangas y Somiedu pa la observación d'osos; la zona central d'Asturies p'asistir a la berrea de venaos y les ríes de Villaviciosa y del Eo pal avistamientu d'aves limícoles, ente otros enclaves. Según l'Executivu asturianu, estes especies fixeron surdir muncho interés ente un públicu que conoz bien el Parque Nacional de los Picos d'Europa, bien valoráu ente los británicos poles sos aves rapaces. Orquídees y camparines complementen los grupos d'especies nos sos viaxes al Principáu.