El Cantábricu deféndese en veleru

El barcu d'Ecoloxistes n'Acción lluchó esti branu escontra los vertíos y la escesiva turistificación

Tripulación del velero Diosa Maat
Tripulación del velero Diosa Maat

El veleru Diosa Maat, d'Ecoloxistes n'Acción, llegó a puertu depués de dalgo más de dos meses nes agües del Cantábricu. La tripulación, integrada por un capitán, una coordinadora y cuatro persones voluntaries nueves cada selmana, percorrió la costa d'Asturies, País Vascu, Cantabria y Galicia. Nel so viaxe, participaron n'actos reivindicativos, señalaron los puntos más deterioraos de la costa y entamaron actividaes formatives. A lo llargo de 63 díes, el veleru percorrió más de 1.200 milles náutiques y aportó a 29 puertos. Nesti escenariu desarrolláronse les campañes rellacionaes cola sobrepesca, la turistificación y l'alga Gelidium.

Esta singladura dexó visibilizar una ventena de reivindicaciones llocales de tola costa norte, collaborando con bien de colectivos ambientales. Una de les acciones más significatives foi la denuncia pública pol estáu ecolóxicu del ríu Seya (Ribeseya). Tamién se denunció la xestión de la industria turística de los cruceros (Vigo) y sumóse a les reivindicaciones de Fridays For Future.

El veleru Diosa Maat izó una bandera negra nos 14 enclaves de la costa Norte incluyíos nel informe Banderes Negres 2019. En concretu, nel Principáu esa enseña esplegóse nes sableres de San Llorienzo (Xixón) y de Po en Llanes.

Clara Megías, coordinadora de la campaña Veleru n'Acción reconoció que'l resultáu de la campaña braniega «foi bien satisfactoriu y esitosu, yá que dexó espertar la conciencia social pa intentar consiguir un futuru realmente más sostenible».

Valora este artículo

10 votos
Comentarios

El Cantábricu deféndese en veleru