Crez el malestar ente'l profesoráu pol aumentu de la precariedá
27 ago 2019 . Actualizado a las 05:00 h.Inda nun hai una cifra esacta pero los primeros aproximamientos apunten a que nueve de cada diez places de docentes de l'asignatura d'asturianu son medies xornaes. L'espolín que se montó ye mayúsculu, tres la publicación el vienres pasáu de la primer convocatoria de personal interino, la de mayor volume del añu y, en teoría, con toles vacantes. Los afectaos tán buscando l'asesoría de los sindicatos pa ver si pueden organizase y treslladar el so malestar a l'alministración. El problema, reconoz Borja Llorente, de Comisiones Obreres, ye la situación d'interinidá que se vive dientro de la mesma Conseyería d'Educación, onde namái ta nomada la conseyera, Carmen Suárez, y el restu del equipu, que ta montando la vuelta al cole, ta en funciones.
Los llistaos de places disponibles nesta primer convocatoria inclúin 180 places para Primaria y 74 pa Secundaria, d'una asignatura que nun tien reconocida la especialidá docente y que, poro, respuende a un estatus peculiar. La inmensa mayoría de les vacantes a les que pueden aspirar lleven al llau una lletra, que marca les condiciones, una H nel casu de Secundaria y una J en Primaria. Esi códigu ye'l que-yos diz que l'horariu nun ye completu. Munches, amás, son itinerantes.
Esta precarización de les condiciones provocó muncho malestar. Los docentes d'asturianu consideren que se ta abusando de les medies xornaes ensin necesidá. Llorente esplica qu'en cursos anteriores pasaba daqué similar, anque quiciabes non con tantes places. El voceru de CCOO precisa que l'Alministración educativa asturiana espera a ver esactamente qué matrícula tienen los centros n'asturianu y, n'ocasiones, amplía los horarios a posteriori.
Esto nun val nin al profesoráu nin a los sindicatos que reclamen una meyor xestión d'esta asignatura. «Esto nun pasa con nenguna otra materia», esclarien. Lo peor ye que los interinos nun saben a qué atenese cuando faen el pidimientu porque desconocen cómo va quedar esactamente.
