El Principáu reivindica un plan estatal pa dar respuesta a les necesidaes del sector industrial

El conseyeru d'Industria, Empléu y Promoción Económica, Enrique Fernández, punxo en valir la necesidá de dar respuesta a les reivindicaciones de les empreses al traviés d'un plan industrial de calter estatal.

Asina lo señaló'l conseyeru nunes declaraciones realizaes a los medios mentes una visita a Llangréu p'aconceyar cola dirección de la empresa Industrial Química del Nalón. Nesi sentíu, Fernández indicó que ye necesario dar una respuesta conxunta a les esmoliciones del sector industrial al traviés d'una política industrial d'Estáu reflexada nun plan o una estratexa.

Una midida «pa tratar estos problemes y dexar a estes empreses siguir trabayando nunos mercaos qu'agora son globales», informa Europa Press. Nesi sentíu, el conseyeru indicó que si na época actual ye necesario esixir requisitos medioambientales, pa eso hai que tener en cuenta l'impactu sobre la posición competitiva a nivel global. «Hai que diseñar un plan industrial que-yos permita siguir la so actividá nun mercáu global xenerando valir y empléu», sentenció.

---

---