L'ALLA espera que'l director xeneral de Política Llingüística «trabaye pa buscar el consensu sobre la oficialidá»
ACTUALIDÁ
El presidente de l'Academia de la Llingua Asturiana, Xosé Antón González Riaño, esperó que'l director xeneral de Política Llingüística nuevu del Gobiernu asturianu, Antón García, trabaye de cara «a buscar el consensu sobre la oficialidá» de la llingua. En declaraciones a Europa Press, el presidente de la institución posicionóse sobre'l nomamientu pol Conseyu de Gobiernu d'esti miércoles del escritor y editor Antón García como l'encargáu de la Política Llingüística dientro de la Conseyería de Cultura que dirixe Berta Piñán.
Nesi sentíu, Riaño esplicó que-y parez que la conseyera ta faciendo un equipu «de la so total confianza, con xente mui afín». Un perfil onde, según el presidente de l'ALLA, Antón García «encaxa» al tratase "d'un gran escritor y estudiosu de la lliteratura asturiana. Otra manera, esplica que García ta «nun momentu de madurez y coles idees clares sobre lo qu'hai que facer». Con too, Riaño encamentó al director xeneral de Política Llingüística nuevu a trabayar pa buscar el consensu que lleve a la oficialidá del asturianu, per un llau, y a «dende'l primer momentu facer Política Llingüística», per otru.
Y ye que pa Riaño lo que se fixo dende'l Gobiernu asturianu hasta'l momentu foi «una política llingüística de contención», polo qu'espera que se pase a una política «activa d'alcuerdu col marxe xurídicu y llegal del asturianu», que según el presidente de l'ALLA dexa facer «una política llingüística de verdá».
Nesi sentíu, dende l'Academia ufren la so collaboración a la Conseyería «pol bien de la llingua y la cultura asturiana» y anuncien que van solicitar un alcuentru con Berta Piñán, onde quieren tresllada-y los sos encamientos sobre les necesidaes de la llingua asturiana y les prioridaes a llevar alantre nesti momentu.
Amás, la institución tamién quier tresmitir al equipu de Cultura les sos necesidaes y espectatives. «Ye dicir, sobre la situación alministrativa y les necesidaes loxístiques y presupuestaries de l'Academia de la Llingua», sentenció Riaño.