Jaime Izquierdo sorrayó la importancia de fixar población nos pueblos
06 sep 2019 . Actualizado a las 19:53 h.El Comisionáu pal Retu Demográficu del Principáu d'Asturies, Jaime Izquierdo, sorrayó la importancia de fixar población nos pueblos. «Hai que reconquistar l'aldea», dixo Izquierdo, consciente de que los mesmos habitantes de les zones rurales yeren precisamente los qu'educaben a los sos fíos pa que colaren.
«Esi ye'l drama: los últimos aldeanos, cuando vieron la derrota, emburriaron a los sos fíos afura», comentó nunes declaraciones na SER. Esa aldea que, según Izquierdo, ta perdiéndose definir como «una estructura protourbana que sabe axustar y rellacionase cola naturaleza». La so recuperación, dixo, nun pue ser una solución aisllada.
Sicasí punxo l'exemplu d'Asiegu, nel conceyu asturianu de Cabrales, qu'apocayá foi nomáu Pueblu Exemplar d'Asturies pola Fundación Princesa d'Asturies. Izquierdo esplicó qu'ellí había dos c mozos que se formaron cola so güela, con una educación llabradora y que depués se fixeron xeógrafos. «Combinaron conocencia y recuperaron l'aldea, ye un fenómenu estraordinariu», dixo.
Considera qu'España llega tarde a la de concenciase del problema de la despoblación. A la contra que como actuó Francia, esplicó, depués de la Guerra Mundial, cuando fixo una llexislación pa «lleones» y otra pa «mures». Con estes palabres, el Comisionáu esplicó que se fixeron normes pa grandes esplotaciones y industria y otres distintes pa que los pueblos nun perdieren la so condición. «Los franceses sabíen que lo que se facía nos pueblos yera bien importante. Y eso n'España perdióse nos años cincuenta», llamentó.
El cargu de Comisionáu pal Retu Demográficu del Principáu d'Asturies ye de nueva creación y depende de Presidencia, nel Executivu que preside'l socialista Adrián Barbón.