Búsquense buzos voluntarios pa llimpiar el puertu de Cuideiru

L'actividá entámala'l «Grupo Ensidesa de Actividades Subacuáticas» que lleva 25 años sacando basoria del fondu marín

Un buzo saca una silla del fondo del puerto de Cudillero

«Precisamos voluntarios: llimpieza somarina del puertu de Cuideiru 2018». Asina empieza l'anunciu del «Grupo de Ensidesa de Actividades Subacuáticas» (GEAS) que, el próximu 14 d'ochobre, va sacar tola basoria que pueda del fondu del Cantábricu. Nun ye la primer vegada que realiza esti tipu d'iniciatives. Lleva 25 años collaborando cola "Red de Vigilantes Marinos", nuna iniciativa que suel axuntar hasta 1.500 aficionaos de centros de bucéu de toa España. Busquen un doble oxetivu, concenciar a la sociedá y poner el so granín d'arena retirando la basuraleza. Cunten col respaldu tamién del Conceyu de Cuideiru.

Anguaño, como novedá, el GEAS va cuntar con un stand de bioloxía marina dirixíu a los neños. El puestu va tener conteníos pa que puedan aprender coses interesantes de los animales qu'apaecen ente los residuos que van retirando. El colectivu considera importante empezar a trabayar coles xeneraciones nueves, porque son les que nel futuru van tener que protexer la mar.

Esta llimpieza va ser un bon termómetru pa saber cuálu ye l'estáu actual del Cantábricu. Va sirvir como toma de datos, incluyendo la caracterización de los residuos n'estudios nacionales ya internacionales, como'l proyectu Marnoba.

El Grupo de Ensidesa abrió esta actividá a tolos amantes de la mar que quieran collaborar de manera altruista. Busquen buzos pero tamién pescadores somarinos y ayudantes dende tierra. «¡Toa ayuda ye necesaria!», señalen. A cambiu, ufierten una paella pa tolos qu'asistan. Namái ye preciso inscribise antemanadamente, al traviés d'un whatsapp al númberu 699196053 o d'un corréu electrónicu a infoclubgeas.es

Valora este artículo

10 votos
Tags
Comentarios

Búsquense buzos voluntarios pa llimpiar el puertu de Cuideiru