El primer xuegu de rol n'asturianu algama financiación en cuatro hores

La primer historia, pa la que precisaben 2.500 euros pa poder llegar a les tiendes, titúlase «Operación Povisa»

Presentación de «Depués d'ochobre», el primer juego de rol en asturiano
Presentación de «Depués d'ochobre», el primer juego de rol en asturiano

redacción

El primer xuegu de rol ambientáu n'Asturies y n'asturianu, «Depués d'ochobre», algamó en cuatro hores y media los 2.500 euros que precisaba pa salir a la cai gracies a la so campaña de crowdfunding, que s'abrió esti sábadu.

Pel momentu yá s'avera a los 7.000 euros rexistros na plataforma Verkami, lo que va permitir publicar dellos «stretch goals» o «llogros d'allargamientu' que van permitir enantar l'universu de «Depués d'Ochobre» con histories, personaxes, ilustraciones y ambientaciones nueves. El xuegu ta ambientáu nuna Asturies alternativa, onde trunfó la Revolución d'Ochobre de 1934. Asina, convirtióse na República Socialista Soviética d'Asturies (RSSA), que forma parte de la URSS, informa Europa Press.

La primer historia, pa la que precisaben 2.500 euros pa poder llegar a les tiendes, titúlase «Operación Povisa». Ta centrada nuna compañía cinematográfica de Hollywood que ta de camín a Mieres pa rodar un documental. La Central sospecha que pueden esconder dalgo y manda --a los xugadores-- «acoyer a los güéspedes cola hospitalidá asturiana y soviética».

Sicasí, nestos momentos el xuegu yá algamó una financiación de más de 6.500 euros, lo que va permitir la edición d'otres histories d'espies, con temátiques como'l nomamientu del primer papa sovieticu, sobre unos axentes americanos que se faen pasar por asturianos o'l desembarcu de los nazis na sablera de Xago, que va 'lliberase' si se llega a los 7.000. Asina hasta un tope de 30.000 euros, que diben permitir enanchar la historia hasta conocer como sería l'Asturies sovietica de 1990 y que pasa nesti territoriu al cayer la muria de Berlín.

Nicolas Bardio ye l'autor de les histories d'esti xuegu y Xon de la Campa l'autor de les ilustraciones. La financiación algamada va permitir qu'estos autores cubran los gastos de la edición y la distribución, amás de les 'recompenses' --mapes, banderes o propaganda de la ficticia Asturies sovietica-- pa les persones que participaron na campaña pa sacar alantre la primer edición.

Comentarios

El primer xuegu de rol n'asturianu algama financiación en cuatro hores