La Xunta afina la banda sonora de la oficialidá

s.d.m. REDACCIÓN

ACTUALIDÁ

La edición número 30 del concierto de la oficialidad organizado por la Xunta pola Defensa de la Llingua
La edición número 30 del concierto de la oficialidad organizado por la Xunta pola Defensa de la Llingua XPDL

El colectivu prepara un espectáculu n'Avilés n'homenaxe a los 30 años de conciertos reivindicativos

22 oct 2019 . Actualizado a las 05:00 h.

La banda sonora del asturianu de los 30 últimos años, la que sonó n'actos reivindicativos, fiestes, manifestaciones y mitinos, interpretada polos principales nomes de la escena del Principáu. La Xunta pola Defensa de la Llingua prepara un espectáculu n'Avilés, nel teatru Palacio Valdés, que trata de remembrar la importancia de la música na reivindicación. Asina lo esplicó'l so presidente, Carlos Pulgar.

Pocu más se sabe. Va ser el 14 d'avientu, a les siete de la tarde, nel teatru Palacio Valdés. De siguío, va entamase una fiesta que se va celebrar nel edificiu de l'antigua pescadería. El restu de la información va dir lliberándose adulces, selmana a selmana. La Xunta pola Defensa de la Llingua va utilizar les sos redes sociales pa dir xenerando espectación y pa dir cuntando quién va tar sobre les tables. Lo que sí trescendió ye que va ser más qu'un conciertu. L'espectáculu va cuntar con un guión y va haber vídeos, hestories y sorpreses.

Too va remembrar los 30 años de conciertos pola oficialidá que se cumplieron xusto va un añu. La cita ta dirixida tanto a los señardosos habituales como a los nuevos. Asina lo cuntó la Xunta nel so primer mensaxe sobro esti espectáculu sorpresa. «Si nun tuvisti en dalgún de los 30 conciertos pola Oficialidá, tienes la Wikipedia pa entérate de la historia. Pero si pal 30+1 quies ser parte de la historia, vas poder facelo d’equí a poco. Avilés d’avientu. #conciertu14A #oficialidá», señaló nun tuit va una selmana.

Efectivamente esiste una entrada na enciclopedia online qu'esplica que'l Conciertu pola Oficialidá ye un conciertu reivindicativu organizáu pola Xunta Moza, estaya de mocedá de la Xunta pola Defensa de la Llingua Asturiana que vien celebrándose dende 1989, y que repasa tolos cartelos. Precisamente, el primeru de toos entamóse nel mes d'abril d'esi añu 1989, n'Avilés. Naquella ocasión tuvo llugar na Pista de la Esposición, n'Avilés.