Seis quesos ganen la medaya nel certame mundial que va celebrase´l próximu añu n'Uviéu
25 oct 2019 . Actualizado a las 09:36 h.El World Cheese Awards celebráu en Bérgamo (Italia) premió a seis quesos asturianos. El certame de quesos más importante del mundu gallardonó a trés productos de la quesería Rey Silo, a otros dos de Mantequerías Arias y a otru quesu d'unos productores de Les Regueres, Quesería Artesanal Lazana. La próxima edición del concursu mundial va celebrase n'Uviéu del 4 al 7 de payares de 2020.
El ganador absolutu en Bérgamo foi Roger Creamery, d'Estaos Xuníos, que llogró una puntuación de 100 sobre 100. Asturies tamién formó parte del palmarés con trés gallardones, algamaos pola quesería Rey Silo. Dos oros pal Rey Silo Afuega'l Pitu Blanco y otru pal quesu Massimo, que la convierten na empresa asturiana más premiada de la hestoria del certame. Nel concursu, participaron unos 3.800 quesos procedentes de tol mundu.
Amás, la empresa asturiana Mantequerías Arias, con sede en La Ribera, llogró dos bronces. Unu pol quesu fresco Flor de Ronda y otru por Boffard Reserva. Amás, la Quesería Artesanal Lazana, de Les Requeres consiguió una plata pol so quesu "Origen".
Begoña López, directora xeneral de Desarrollu Rural ya Industries Agraries, simbolizó la recoyida del testigu del festival cola entrega d'un quesu de Cabrales a la entidá organizadora, Guild of the fine food. López sorrayó que la celebración d'esti certame supon tanto una oportunidá como una reconocencia al trabayu de ganaderos, llabradores y queseros d'Asturies, amás de sirvir «pa impulsar tola nuesa industria agroalimentaria». López felicitó a Bérgamo pola so magnífica organización» y animó a tolos asistentes a participar nel Asturies Paraísu Natural International Cheese Festival 2020.
Los World Cheese Awards van cumplir 33 ediciones n'Uviéu. Nesti concursu van participar más de 3.000 quesos y 250 xueces internacionales encargaos de dictaminar cuálos son los meyores. Espérase que más de 10.000 persones asistan al eventu.
El certame, qu'inclúi tamién una exhibición de productos, va atrayer al Principáu a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu.
Amás, l'Asturies Paraísu Natural Internacional Cheese Festival inclúi la organización de numberoses actividaes en tola rexón mientres 2020. Ente elles, un congresu científicu y gastronómicu y una olimpiada de quesos de monte.