Sergio Álvarez Moya raspia'l trunfu en Helsinki

El caballeru avilesín acabó segundu na prueba de la Copa del Mundu


El caballeru asturianu Sergio Álvarez Moya ta entamando con bien bon pie la Copa del Mundu de saltu d'obstáculos d'hípica. L'avilesín, instaláu dende va años na élite mundial, acabó ayeri segundu na prueba celebrada en ?elsinki , en Finlandia, la segunda del calendariu. Na calificación xeneral ocupa'l sestu puestu.

Moya compitió al llombu de Jet Run, de nueve años, col que yá trunfara na FEI Jumping Nations Cup de Barcelona. L'asturianu consiguió concluyir ensin penalizaciones na prueba definitiva. A la competición llegaren 37 caballeros, de los qu'ocho realizaron el primer percorríu ensin faltes y namái cuatro contabilizaron un doble cero.

El trunfador nel desempate foi'l británicu Robert Whitaker, que montaba a Catwalk IV. Whitaker paró'l crono en 38,13 ente que Moya emplegó 39,81 segundos. En tercer posición acabó l'amazona belxicana Celine Schoonbroodt de Azevedo con Cheppetta. La próxima cita de la Copa del Mundu va ser en Lyon (Francia) ente los díes 31 d'ochobre al 3 de payares. Moya, ocupa nesti momentu'l sestu puestu na clasificación xeneral.

Comentarios

Sergio Álvarez Moya raspia'l trunfu en Helsinki

Cola ayuda de