El Parque de la Prehistoria de Teberga entama una orixinal actividá ente'l 1 y el 3 de payares
31 oct 2019 . Actualizado a las 05:00 h.La temporada de castañes ta nel so meyor momentu y son delles les celebraciones que se celebren en toa Asturies pa da-y valir a la riqueza d'esti alimentu. Unu d'estos eventos va tener llugar nel Parque de la Prehistoria de Teberga, qu'entama un orixinal amagüestu ambientáu nel Paleolíticu del 1 al 3 de payares.
Trátase d'una actividá llúdica per aciu de la que va facilitase a cada cla los instrumentos fayadizos pa qu'intenten consiguir fueu. En llográndolo, van salir a pañar mazanes y castañes forníos con un zurrón. Tres la recoyida, va facese l'amagüestu, yá colos medios actuales, y va repartise ente los participantes castañes y sidra dulce natural. Los organizadores señalen que l'actividá ta encamentada pa públicu familiar con menores a partir de 4 años, qu'han de tar acompañaos «polo menos, por un adultu».
Amás, el públicu que s'avere esta ponte al Parque de la Prehistoria de Teberga va poder percorrer la galería, la zona museística del equipamientu, de forma llibre o guiada a les 11:00 hores. Tamién va haber visites guiaes a la Cueva de Cueves, l'espaciu que recrea fielmente l'ambiente del interior de los covarones con reproducciones a escala real de trés significativos conxuntos del arte rupestre paleolíticu européu, del 1 al 3 de payares, a les 12:30, 13:45, 16:00 y 17:30 h.
Del 1 al 3 de payares, el Parque va permanecer abiertu de 10:30 a 14:30 y de 15:30 a 18:00 h. Les entraes pa visitar l'equipamientu o pa participar nel amagüestu pueden adquirise antemanadamente en www.parquedelaprehistoria.es.