El cocineru mierense defende que se debe lluchar «por aquellos que nun conocemos» de la mesma forma que «lluchamos polos nuesos»
12 nov 2019 . Actualizado a las 05:00 h.El cocineru asturianu José Andrés fixo un valiente alegatu en favor de la inmigración. Cuando cuerren vientos d'intolerancia y xenofobia, el chef mierense aseguró qu'España y Europa tienen d'invertir nos más probes, nos países del norte d'África que lo tán pasando mal». Añadió que se debe lluchar «por aquellos que nun conocemos» de la mesma forma que «lluchamos polos nuesos». Y punxo un exemplu cercanu. «Si quiero dexar un futuru meyor pa les mios trés fíes va ser non sólo invirtiendo nelles sinón tamién faciéndolo naquellos a los que nun-yos va tan bien».
José Andrés recibió un homenaxe nel Conceyu de Valencia y aprovechó pa falar de Donald Trump. El cocineru almite que tou país tien que protexer les sos llendes y sociedaes, pero matiza: «Nun quies que naide entre na to casa, toos queremos protexer a les nueses families, pero hai una realidá de la que nun podemos escapar; si ún namái s'esmolez de sí mesmu y de los suyos, y non del que ta al otru llau, tarde o pronto va a afectate».
Pal chef, una celebridá internacional, defender qu'hai qu'invertir nes sociedaes más probes «nun ye ser de dereches o d'izquierdes, ye ser a cencielles un ser humanu pragmáticu». Y esti pensamientu debe treslladase a España, que sufrió a lo llargo de la campaña electoral discursos xenófobos. «Nun puede ser qu'en momentos de crecimientu teamos dexando que lleguen inmigrantes porque nos ayuden na construcción, el campu o a cubrir puestos de trabayu qu'al meyor nengún español quier, y nel momentu que la economía nun va tan bién, yá nun los queremos».
El cocineru mierense sostién qu'España tuvo «momentos económicos bien importantes y tuvimos crecimientu gracies a un montón d'inmigrantes» y poro, repitió, «hai que ser un poco lóxicu na política, nun puede ser agora sí o agora non». Na so opinión, el gran crecimientu de la humanidá nos últimos sieglos producióse cuando los países «empezaron a abrise y a comercializar riqueza, cultura y economía» y el Mediterraneu, dixo, foi un exemplu.
José Andrés defendió tamién los productos de proximidá y la economía llocal porque «ye misión de caún protexer lo propio», y llamentó que «por aforrar un euru haya barrios nos qu'empiecen a cerrar les tiendes pequeñes» y a la fin «nun tienen nada». Sicasí, considera qu'hai que ser «pragmáticu» y «saber lo qu'hai fuera porque de lo contrario pierdes un poco'l norte de lo que faes, yá nun yes tan competitivu, el to productu yá nun ye tan bono o nun ta a tan bon preciu y un día ensin date cuenta foi'l mercáu embaxo».