L' Abeduriu Trail Race va axuntar a 400 deportistes en L'Entregu

La prueba ye tamién Campeonatu d'Asturies de Speed Trail

Presentación de L´Abeduriu Trail
Presentación de L´Abeduriu Trail

Redacción

Samartín del Rei Aurelio va acoyer el domingu 24 de payares la celebración de la cuarta edición de la popular carrera de monte «Abeduriu Trail Race», una prueba de 16 quilómetros de percorríu que preve axuntar nel conceyu a un total de 400 corredores.

La prueba, entamada pola Asociación Deportiva Fesoria Events, ye tamién Campeonatu d'Asturies de Speed Trail, de la Federación de Monte del Principáu d'Asturies (FEMPA). La carrera va salir a les 10,30 hores de la plaza de la ilesia, en L'Entregu, con salida hacia L’Abeduriu, con un percorríu de 16.000 metros y un desnivel positivu de 1.000 metros. Como novedá, anguaño la prueba incorpora la categoría de cadetes, que se suma a les habituales hasta absoluta y a la competición por relevos de pareyes.

Ta previsto qu'alredor de 400 corredores, homes y muyeres, participen na prueba. La inscripción va permanecer abierta na web  hasta'l día 21 de payares. Pueden participar corredores federaos y non federaos, siendo'l preciu de la inscripción de 15 y 18 euros, respectivamente. La edá mínima de participación ye de 14 años.

A la presentación de la prueba nel conceyu foi'l presidente de l'asociación Fesoria Events, Xandru Torre, la vocal del área de carreres per monte de la FEMPA Tensi Carmona, la integrante del equipu de carreres per monte Esther Bello, y el conceyal de Deportes, Honorino Montes. Los asistentes coincidieron en destacar l'afitamientu de la carrera y l'importante fluxu de públicu de distintes procedencies d'Asturies y d'otres comunidaes autónomes qu'atrái cada añu, y la repercusión na economía local de la zona, especialmente na hostelería. La de L'Abeduriu ye amás una de les actividaes deportives más allegaes de les que s'entamen nel conceyu.

Comentarios

L' Abeduriu Trail Race va axuntar a 400 deportistes en L'Entregu