Iniciativa pol Asturianu pide que´l nuevu Gobiernu d´España reconoza la especialidá docente d´asturianu

Iván Llera, presidente d’Iniciativa pol Asturianu, fixo unes declaraciones sobre l’alcuerdu pal Gobiernu d’España. Llera dixo que «ye hora d’iguar una situación de desigualdá profesional qu’afeuta a los y les profesores de llingua asturiana. El nuevu Gobiernu d’España tien la oportunidá de da-y solución a una anormalidá que lleva a los trabayadores de la enseñanza d’asturianu a tar en piores condiciones qu’el restu de compañeros». 

«Esta ye una demanda hestórica de la comunidá educativa asturiana y que pal Ministeriu d’Educación únicamente implica l’aprobación d’un documentu que nun-y supón nengún problema. Ye’l momentu de facer les coses con responsabilidá y valentía» pidió Llera. Iván Llera añadió que «dende Iniciativa pol Asturianu pedimos a los diputaos y les diputaes d’Asturies nes Cortes que faigan un esfuerciu pa treslladar esta necesidá a los responsables del Ministeriu d’Educación. Facer llegar esta cuestión y desplicala a les autoridaes del nuevu Gobiernu ye collaborar pa finar con una inxusta desigualdá llaboral». 

Nesi sentíu, el representante de la organización reclamó tamién el cumplimiento de la toponimia oficial nes víes de tráfico estatales y llograr un compromisu del nuevu Gobiernu pa que nos futuros presupuestos apaezca una partida pa l’Academia de la Llingua Asturiana como vien reclamando Iniciativa pol Asturianu dende va unos años. 

Por último, el presidente d’Iniciativa pol Asturianu recalcó que «dende la nuesa organización recordamos que l’aprobación de la especialidá docente d’asturianu nun tien nenguna vinculación directa cola oficialidá. Nun val utilizar la falta de reconocencia cola aprobación d’esta midía». 

---

---