Mocedá pol clima

greta

Redacción

Nel manifiestu del movimientu xuvenil Fridays for future, dizse que nagüen pola defensa del planeta. Que se sienta la voz de los científicos y que yá tamos viviendo les primeres consecuencies de la crisis ambiental. El cambéu climáticu, el desaniciu masivu d'especies y d'ecosistemes, la desertificación y l'acidificación del océanu. Afiten que nun puen quedase paraos mientres el planeta se desfai, cola fras de Greta Thumberg «¿De qué sirve dir a escuela si nun tenemos futuru?»

Poro, quieren incidir na axenda y sopelexar l'estáu d'emerxencia climática, polo que se xunten tolos vienres. Quieren frenar el cambéu climáticu porque aseguren que queda un deceniu pa que nun seya irreversible. Namái busquen oyer a la comunidá científica y puxar poles alternatives sostenibles a la crisis climática. Nesi sen, Italia ye'l primer estáu qu'impartirá una hora selmanal de cambéu climáticu nes escueles, de magar el cursu que vien.

Siguen a Greta Thunberg, estudiante y activista sueca que fizo una notoria fuelga pol clima ella sola delantre'l Parllamentu suecu nel 2018. Esi añu entamó'l movimientu Mocedá pol clima, que ya tien la so estaya Fridays for future Asturies, y punxo discursu na Conferencia de les Naciones Xuníes sobre'l Cambéu Climáticu. Nel 2019 foi propuesta al Premiu Nobel de la Paz, algamando la so versión alternativa. Ella llogró la movilización de millones de persones nel mundiu al simbolizar el so noxu por una catástrofe ambiental heredada d'otres xeneraciones que yá-yos cinca a ellos. «Si hai xente enforma lluchando polo correuto cualesquier cosa ye dable», afitó.

Dende qu'entamó la industrialización, el xorrecimientu del CO2 provocó l'aumentu les temperatures nel planeta. Ye responsabilidá de tola Humanidá, de la que Greta Thunberg ye un símbolu, lluchar pola sobrevivencia. Según la revista Nature, 140 millones de probes perderán los sos llares nel 2050, tornándose en refuxaos climáticos. El tercer mundiu pagará'l 70% del cambéu climáticu del que namái produz el 10% del CO2. Les emisiones del 0,54% de la xente rico equival al 13,6% del total de les emisiones rellaciones col estilu de vida. Y nes sos manes ta l'accesu a les nueves teunoloxíes.

Greta Thunberg, una moza independiente con 16 años entamó un movimientu que s'alcuentra en más de 160 estaos y 1700 ciudaes del mundiu. Quier llendar l'aumentu de temperatura global a 1,5 graos, pola referencia del alcuerdu climáticu de París nel 2015. Diz que'l cambéu tien d'entamar güei, porque nun hai tiempu. Nestes cuestiones ye nidia y contundente.

D'esta miente, Fridays for Future recibió la mayor reconocia ambiental de la ONX na categoría Inspiración y Aición, por esparder l'alderique del calecimientu global nel so peor momentu hestóricu. Apurriendo enfotu y sensación d'urxencia a la sociedá mundial porque entienden que tán en xuegu les nueses vides. Piden una aición radical a la clas política escontra'l cambéu climáticu, sofitando que la mocedá ta sollertes a la pasividá de los adultos. «Si nun meyoramos la situación, morremos», ye una de les sos frases. «Nun mos robéis el futuru» y «escuchái a los científicos», son otres de les que provocaron l'espertar d'una xeneración. En marzu del 2019, 1,5 millones de neños del mundiu enteru ficieron la primer fuelga mundial pol clima porque «la nuesa casa ta en llames» y «ye la crisis más importante enfrentada enxamás pola Humanidá».

Los adultos cargamos sobre la mocedá tol procesu de destrucción que yá mos afeuta. Ellos nun quieren ser referente, sinón pinchar na conciencia de toos acelerando la posible igua de tolo que mos xugamos. 

Greta Thunberg sigue d'actualidá porque veráse nel Cume del Clima entamáu pola ONX, en Madrid. ¿Fadrá posible esta moza que se garre conciencia de la gravedá de la situación mundial na tema?

Comentarios

Mocedá pol clima

Cola ayuda de