Desarrollu Rural afirma que l'ocalitu tien efectos positivos sobre'l mediu al ser «el mayor sumidoriu de CO2»
ACTUALIDÁ
N'Asturies hai más de 60.000 hectárees con ocalitos, lo que supón un 20% de la superficie arbolada de la comunidá autónoma
05 dic 2019 . Actualizado a las 05:00 h.El conseyeru de Desarrollu Rural, Agroganadería y Pesca, el socialista Alejandro Calvo, afirmó esti llunes que l'ocalitu tamién tien «efectos positivos» pal mediu ambiente como ser «el mayor sumidoriu de CO2». Asina lo indicó'l conseyeru na Comisión de Desarrollu Rural de la Xunta Xeneral y énte una entruga de la diputada de Podemos Asturies Nuria Rodríguez sobre la superficie dedicada al ocalitu na rexón. N'Asturies hai más de 60.000 hectárees con ocalitos, lo que supón un 20% de la superficie arbolada de la comunidá autónoma.
Calvo señaló qu'esta ye la superficie marcada pol Plan Forestal y recordó que tolos plantíos tán sometíos a una autorización alministrativa previa. Amás, indicó qu'anque l'usu mayoritariu de la madera que provién del ocalitu ye pa la celulosa y biomasa, cada vez s'estiende más a construcción y moblería. Nesi sentíu, insistió que les hectárees d'ocalitos tán dientro del marxe establecíu y indicó a la diputada de Podemos qu'esti árbol nun ye una especie invasora, sinón foriata, y que nun tien namás efectos negativos, porque «tien efectos positivos pal mediu ambiente» al ser una especie de crecedera rápida, lo que la convierte «nel mayor sumidoriu de CO2».
Per otru llau, la diputada de Podemos Nuria Rodríguez aseguró que'l cupu d'hectárees yá se superó al tener el Principáu «una política col monte basada nel ocalitu». Asina, denunció que n'Asturies yá hai plantíos "«de sobra» d'ocalitu y que esti árbol «dexa ermu» el terrén al ser «una especie invasora». Coles mesmes, señaló que l'apueste del Executivu poles renovables podría llevar detrás a un aumentu de les hectárees dedicaes a esta maderes, amás de que les empreses que nestos momentos utilicen esta materia aumentaron la producción, «polo que los datos nun coinciden». P'acabar, criticó les palabres del conseyeru a favor del ocalitu. «Nun me diga que l'ocalitu recueye más CO2, porque si hubiera otra especie absorbería'l mesmu CO2», señaló.