Una tesis constata la celebración d'una misa n'asturianu n'El Pardo pa celebrar les bodes d'oru de Franco y Carmen Polo
ACTUALIDÁ
Esti ye dalgún de los datos que descubre l'investigador Inaciu Galán en «La llingua asturiana nel Franquismu»
17 ene 2020 . Actualizado a las 14:12 h.En 1973, el Palaciu del Pardo, residencia oficial de la xefatura del Estáu franquista, acoyó una misa n'asturianu con motivu de los 50 años del so matrimoniu cola asturiana Carmen Polo.
Esti ye dalgún de los datos que descubre l'investigador Inaciu Galán na tesis La llingua asturiana nel Franquismu, onde s'ilustra la represión llingüística «xeneralizada» que se vivió nes escueles a lo llargo del Franquismu y que va presentase esti 21 de xineru na Universidá d'Uviéu, informó l'autor.
La tesis fala de la situación de la llingua asturiana na dictadura, faciendo un repás a la ideoloxía que'l franquismu construyó. Otra manera, tamién s'analiza'l papel del Institutu d'Estudios Asturianos (IDEA), la situación de la lliteratura o'l papel de l'asociación Amigos del Bable, fundada en 1969, informa Europa Press.
Ente les curiosidaes que descubre la tesis, amás de casos de neños castigaos nes escueles por usar l'asturianu, tamién se constata la presencia del asturianu nes visites de Franco a Asturies, o la celebración d'una misa en llingua asturiana nel Palaciu del Pardo, en Madrid, con motivu de los cincuenta años del so matrimoniu cola asturiana Carmen Polo.
Amigos del Bable, un ponte ente dos modelos d'asturianismu
L'investigador Inaciu Galán afirmó esti martes n'Uviéu que l'asociación Amigos del Bable, fundada en 1969, funcionó de ponte ente la visión más folclórica predominante nel Franquismu y la del movimientu de reivindicación llingüística del asturianu actual. Asina lo indicó na charla Amigos del Bable, alcordanza nel 50 aniversariu de la fundación, qu'ufrió dientro de les Xornaes Internacionales d'Estudiu.
La charla ye una parte de la so tesis, que va presentar nes selmanes próximes y na qu'estudia l'usu del asturianu a lo llargo de los años del Franquismu. Con ella, Galán quixo reivindicar el papel de l'asociación Amigos del Bable, fundada en 1969 y que queria revitalizar l'usu del asturianu al traviés del so usu lliterariu.