Frixuelos, horros, Educación pa la Ciudadanía y censura educativa de les dereches, el mal nomáu pin parental
ACTUALIDÁ
El mal nomáu pin parental ye un vetu ideolóxicu de les dereches que quier alimentar la censura, la polarización y un control cuasi policial nes nuestres aules. Los partíos que se llamen constitucionalistes, y que dicen ser los mayores defensores de la llibertá, paradóxicamente quieren llendar esa llibertá. Por suerte, les más de les families saben que les actividaes nes que les dereches nun quieren que participen los sos fíos, son complementaries del centru, formen parte del programa escolar, tán afitaes pol Conseyu Escolar (formáu por families, docentes y estudiantes) y supervisaes pola Conseyería d’Educación. Los centros educativos refuguen una polémica artificial que se basa en cuestionar la llibertá de cátedra y la profesionalidá de los docentes y la so enseñanza. Ensin dulda, tenemos facer un llamáu a la diversidá democrática, la convivencia, al derechu de los estudiantes a un pensamientu críticu, al alderique y al refugu. Pero en realidá, anque esta vegada seya Vox el qu’enarbolia la bandera, esta actitú intransixente qu’ataca a les instituciones democrátiques nun ye nueva. Educación pa la Ciudadanía y los Derechos Humanos foi’l nome de l’asignatura aprobada pol Parllamentu español según afitaba’l Real Decretu 1631/2006. Favorecía’l desenvolvimientu de persones llibres y formaes al traviés del afitamientu de l’autoestima, la dignidá personal, la llibertá y la responsabilidá col envís de formar futures persones con criteriu propiu, respetuoses, participatives y solidaries, que conozan los sos derechos, asuman los sos deberes y desenvuelvan vezos cívicos pa que puean exercer la ciudadanía de forma eficaz y responsable. Esta llei cuntó cola oposición del PP de mano «pol so calter doctrinariu ya ideolóxicu», yá qu’afirmaben qu’atentaba «escontra’l derechu de los padres y estremaba a la sociedá». Lo que nun dicíen los conservadores ye que l’asignatura cumplía con un pidimientu del Conseyu d’Europa nel añu 2002, qu’encamentaba a los Gobiernos de los Estaos miembros que ficieren de la educación pa la ciudadanía democrática un oxetivu prioritariu de les polítiques y reformes educatives. Afirmábase que la educación pa la ciudadanía democrática yera esencial pa la misión principal del Conseyu, porque promovía una sociedá llibre, tolerante y xusta, amás de contribuyir a la defensa de los valores y los principios de llibertá, pluralismu, derechos humanos y Estáu de Derechu, que constituyen los fundamentos de la democracia. A lo cabero’l Tribunal Supremu decidió que nun se podía oxetar yá que l’asignatura nun torgaba’l derechu de los padres a que los sos fíos recibieren la educación relixosa y moral que desearen.
Hai qu’alcordase de que’l pueblu español vivió una época d’adoctrinamientu a lo llargo de 40 años. Nel rexime franquista que Vox tanto almira, y al que quier que volvamos, España nun yera llibre, nin plural, nin crítica, nin muncho menos abierta a estremaos pensamientos y alderiques, porque reinaba una censura qu’abarcaba tolos campos. Morente Valero fala na tesis titulada La Depuración del Magisterio Nacional hasta de 60.000 maestros depuraos: sanciones, despidos, exilios, fusilamientos col envís d’acabar cola llibertá de pensamientu de cientos y cientos de docentes poco simpatizantes o contrarios al franquismu. Pa esti motivu, emplegaron munches midíes represives: les Comisiones de Depuración, informes policiales, Declaraciones Xuraes… La universidá tampoco se llibró d’esti adoctrinamientu y purga, non solo munchos profesores quedaron ensin trabayu pa colocar a los más cercanos al rexime, sinón que, como diz l’historiador Jaume Claret, hebo actos inxustificables como’l fusilamientu del rector d’Uviéu, Leopoldo Alas, o del rector de Granada, discípulu predileutu d’Unamuno, ente otros. Fueron tiempos escuros onde’l mieu ante les denuncies paralizó a los centros educativos. Ibáñez Martín, ministru d’Educación franquista, describió asina la represión al profesoráu na apertura del cursu 1940-41: «Era así vital para nuestra cultura segar con golpes certeros e implacables de guadaña la maleza, limpiar y purificar los elementos nocivos. Si alguna depuración exigía minuciosidad y entereza para no doblegarse con generosos miramientos a consideraciones falsamente humanas, era la del profesorado».
El grupu parlamentariu de Vox na Xunta Xeneral del Principáu d’Asturies va llevar al próximu plenu ordinariu una proposición non de llei sobre’l mal llamáu pin parental. Amás, llama a los grupos de PP y Ciudadanos a qu’esclarien «de qué llau tán», ya que nun puen permitir que les escueles tean p’adoctrinar. Vox camienta que ta nel llau correutu, el de les organizaciones ultraderechistes como Hazte oir; ye dicir, na censura educativa. Llamentablemente óyese poco la voz d’Alberto Núñez Feijóo cuando afirma que ta frente a «los estremismos». Casado debería preocupase de que’l portavoz del PP nel Parlamentu vascu y presidente del PP en Guipúzcoa, Borja Sémper abandonare’l so partíu, anque nel fondu impórta-y poco. Dexar que los eurodiputaos del PP español se desmarquen del PP européu p’alliniase colos eurodiputaos del ultraconservador ECR (onde s’integra Vox) y votar escontra d’un resolvimientu del Parlamentu européu que vixile la deriva autoritaria d’Orban y Kaczynski en Polonia y Hungría, nun ye una midida averada al centru políticu.
Tien razón el ministru de Cultura y Deporte, José Manuel Rodríguez Uribes, cuando diz que’l mal llamáu pin parental propuestu por Vox «ye prexuiciu, intolerancia y mieu». Esti auténticu despropósitu ye una oxeción de conciencia tapada qu’ataca a la educación pública. La mala noticia pa España ye que’l PP, dirixíu agora pol Casado, decidióse va tiempu en que llau ta y dio cuenta d’ello n’Asturies cuando trató de llendar los nuestros derechos llingüísticos falando d’horros y frixuelos. ¿Hasta cuándo siguirán nesta peligrosa deriva que refuga l’Estáu de Derechu y una sociedá llibre, tolerante y xusta que contribuya a la defensa de los valores y principios de pluralismu y derechos humanos? Si’l PP nun camuda de dirección va vese superáu en pocu tiempu pola ultraderecha.