La sentencia diz qu'un Conceyu nun tien potestá pa regular l'usu d'una llingua non oficial como l'asturianu n'igualdá de condiciones col d'una oficial como'l castellanu
11 feb 2020 . Actualizado a las 17:32 h.El Tribunal Superior de Xusticia del Principáu d'Asturies (TSXA) anuló la Ordenanza del usu de la llingua asturiana del Conceyu de Mieres por establecer qu'asturianu y castellanu son, n'igualdá de condiciones, les llingües del Conceyu, una cuestión recurrida pol PP.
La ordenanza aprobóse nel Plenu de Mieres el 22 de marzu de 2018 y nel so primer artículu establez que «la llingua asturiana ye, col castellanu, la llingua empleada pol Conceyu de Mieres, l'Alministración Local y les corporaciones públiques que d'ella dependen».
Esto llevó al grupu municipal del PP a recurrila, porque entendieron que al nun ser l'asturianu una llingua oficial esi primer artículu diba contra la Constitución y l'Estatutu d'Autonomía, polo que solicitaron la so anulación.
Agora, nuna sentencia del 20 de xineru de 2020 a la que tuvo accesu Europa Press, la Sala de lo Contencioso Alministrativo del Tribunal recordó les sentencies previes nesi sentíu, como la relativa a la Ordenza del asturianu de Noreña que yá foi anulada, pa establecer qu'un Conceyu nun tien potestá pa regular l'usu d'una llingua non oficial como l'asturianu n'igualdá de condiciones col d'una oficial como'l castellanu.
La situación, según la sentencia, llevaría 'de facto' a declarar la oficialidá del asturianu nesi conceyu, dalgo pa lo que nun tien competencies un Conceyu y que namás pue regulase al traviés de la reforma del Estatutu d'Autonomía. Amás, la Ordenanza de Mieres tampoco nun inclúi una valoración económica sobre lo qu'implicaría la so puesta en marcha.
Too eso lleva al TSXA a anular la Ordenanza por nun ser conforme a derechu y impón les costes del recursu al Conceyu, que xuben a 1.000 euros.